თიბისი ბანკის გენერალური დირექტორის, ვახტანგ ბუცხრიკიძის განცხადებით, საჭირო საბუთების შეგროვების შემდეგ საქმიანი რეპუტაციის შელახვისთვის ისინი ომეგა ჯგუფის დამფუძნებლის, ზაზა ოქუაშვილისთვის სასამართლოში ჩივილს გეგმავენ:

"ახლა ვაგროვებთ საბუთებს და ვისაც მოეთხოვება პასუხი სასამართლოში შევიტანთ".

ვახტანგ ბუცხრიკიძის განცხადებით, ბოლო დღეებია ბანკისა და კონკრეტულად სამუშაო საათებთან დაკავშირებით ტყუილი ინფორმაცია ვრცელდება:

"გახსნის დღიდან, 2005 წლიდან მარჯანიშვილის ფილიალი მუშაობს დილის 9 საათიდან საღამოს 8 საათამდე. დიახ, იურიდიული განყოფილებაც მუშაობს დილის 9 საათიდან საღამოს 20-მდე. ტყუილს აქვს ადგილი და ინტერპრეტაცია სხვანაირად მოხდა".

რაც შეეხება ჩემს ნაცნობობას, ბუცხრიკიძის თქმით, ის არ იცნობს ოთარ ფარცხალაძეს, გიორგი გახარია კი, როგორც ამბობს ბიზნესომბუდსმენად გაიცნო.

"ოქუაშვილის ბრალდება სატელეფონო ზარებთან დაკავშირებით — განსხვავებით ოქუაშვილისგან მე არასდროს ვიწერ ჩემს ბიზნესშეხვედრებს. ამ ტრანზაქციას წინ არ უძღოდა არანაირი სატელეფონო კომუნიკაცია ჩემსა და ბატონო ლევან ყიფიანს შორის. საქმე გვაქვს სიცრუეზე დაფუძნებულ ბრალდებებთან. საბანკო პროცედურების სრული დაცვით არის ჩატარებული ტრანზაქცია და ამაზე ინფორმირებულია ფინანსური სამსახური".

30 სექტემბერს რუსთავი 2-ისთვის მიცემულ ინტერვიუში ბიზნესმენმა, ზაზა ოქუაშვილმა განაცხადა, რომ ყოფილმა პრემიერმა და ქართული ოცნების დამფუძნებელმა მას ოთხი მილიონის გადარიცხვა მოსთხოვა და შემდეგ, ახლადშექმნილი კომპანიის მეშვეობით, გადაარიცხინა.

მისივე თქმით, ივანიშვილმა მას პატრიოტთა ალიანსისა და თავისი მოგების 50%-ით ქართული ოცნების დაფინანსებაც მოსთხოვა. თუმცა, როგორც ის ამბობს, მასპატრიოტთა ალიანსი და ქართული ოცნება აღარ დაუფინანსებია.

პირველ ოქტომბერს რუსთავი 2-მა მორიგი აუდიოჩანაწერი გაავრცელა. ტელეკომპანიის მტკიცებით, ჩანაწერით დასტურდება, რომ თიბისი ბანკიდან 4 მილიონის გატანის ოპერაციაში უშუალოდ ჩართულები იყვნენ ყოფილი ბიზნეომბუდსმენი და ამჟამინდელი შს მინისტრი გიორგი გახარია და ყოფილი მთავარი პროკურორი ოთარ ფარცხალაძე.