როგორ აღნიშნავს თბილისი თავის დღეობას

თბილისი თავის დღეობას, ტრადიციისამებრ, ყოველი ოქტომბრის პირველ შაბათ-კვირას აღნიშნავს. თბილისობის დღესასწაულისთვის 6 და 7 ოქტომბერს დედაქალაქის სხვადასხვა წერტილში ღონისძიებებია დაგეგმილი, დაწყებული სპორტული სანახაობებით და დამთავრებული გასტრონომიული ფესტივალით. წელს ძირითადი ღონისძიებები დედაენის ბაღში, რიყის პარკსა და ლეღვთახევში ჩატარდება.

რა თქმა უნდა, თბილისობისთვის მზადება დილიდან იწყება. სხვადასხვა სპორტული სანახაობა და ღონისძიება დედაენის ბაღში იყრის თავს. ბაღში შესვლისას ნარდის ჩემპიონატის მოთამაშეების მაგიდებს ნახავთ.

ტანმოვარჯიშეები არაერთ შთამბეჭდავ და საშიშ ილეთს წარმოგიდგენენ.

პატარა ძალოსნები კი მსოფლიო ჩემპიონის, ლაშა ტალახაძის რეკორდის მოხსნას ცდილობენ.

თბილისობას მუდამ ახლავს შემოდგომის ერთგვარი სურნელება, რადგან სეზონიდან გამომდინარე ყვავილებისა და ხილ-ბოსტნეულის არაერთ დახლს ნახავთ. წელსაც, წინა წლების მსგავსად, ყვავილების ფესტივალი ერთ-ერთ გამორჩეული და ფერადი სანახაობაა.