მართლმადიდებელი ეკლესიის პატრიარქი, ილია მორე უკრაინული ეკლესიის ავტოკეფალიაზე სასაუბროდ უკრაინის დელეგაციას შეხვდა, თუმცა გადაწყვეტილება ამ დრომდე არ მიუღია.

საპატრიარქოს ინფორმაციით, ილია მეორემ მღვდელმთავრებთან ერთად უკრაინის რადას სპიკერი, ანდრი პარუბი და მისი თანმხლები პირები მიიღო.

"აუცილებელია წინასწარი შეფასებებისაგან თავის შეკავება, ვიდრე არ დაფიქსირდება საეკლესიო კანონიკური სამართლის ნორმებზე დაფუძნებული მსოფლიო საპატრიარქოსა და რუსეთის ეკლესიის ოფიციალური და საბოლოო პოზიცია", — განაცხადა მისმა უწმინდესობამ.

კიევის საპატრიარქომ მსოფლიო პატრიარქს რუსეთის საპატრიარქოსგან გამოყოფა ამ წლის აპრილში სთხოვა. მსოფლიო პატრიარქმა ბართლომემ განაცხადა, რომ უკრაინა ავტოკეფალიას მალე მიიღებს, რადგან ეს მისი უფლებაა.

კიევის პატრიარქი ფილარეტი აცხადებს, რომ ავტოკეფალიის საკითხში საქართველოს მართლმადიდებელი ეკლესიის საპატრიარქოს მხარდაჭერის იმედი აქვს. თუმცა, საქართველოს საპატრიარქოს განცხადებით, საჯარო პოზიციას იქამდე არ დააფიქსირებს, ვიდრე კანონიკური სამართლის ნორმებზე დაფუძნებული თითოეული მხარის ოფიციალური და საბოლოო პოზიცია არ იქნება ცნობილი.

29 სექტემბერს საპატრიარქომ განაცხადა, რომ მსოფლიო პატრიარქისა და რუსეთის ეკლესიის მეთაურის მიმართ შეურაცხმყოფელი და დამამცირებელი გამონათქვამები არის მიუღებელი. საპატრიარქოს თქმით, მსგავსი შინაარსის განცხადებები სასულიერო პირთაგან არაერთხელ გაჟღერებულა.