მსოფლიო პატრიარქმა ბართლომემ განაცხადა, რომ უკრაინა ავტოკეფალიას მალე მიიღებს, რადგან ეს მისი უფლებაა. ინფორმაციას ამის შესახებ უკრაინული გამოცემა UNIAN ავრცელებს.

სტამბოლში 23 სექტემბერს ლიტურგიის დროს მან განაცხადა, რომ ჩეხეთისა და სლოვაკეთის შემდეგ, რომლებსაც ავტოკეფალია 1998 წელს მიენიჭათ და ყველაზე ახალგაზრდა ავტოკეფალური ეკლესიებია, უკრაინის ჯერიც მოვიდა.

"ახლა უკრაინის ჯერი მოვიდა, რომელიც ავტოკეფალიის სტატუსს მიიღებს და რეაქციების მიუხედავად, იმედი მაქვს, რომ დიდი ხნით, რადგან ეს მისი უფლებაა", - განაცხადა მსოფლიო პატრიარქმა.

კიევის საპატრიარქომ მსოფლიო პატრიარქს რუსეთის საპატრიარქოსგან გამოყოფა ამ წლის აპრილში სთხოვა. ამ გადაწყვეტილებას მხარი დაუჭირეს უკრაინის პრეზიდენტმა და უმაღლესმა რადამ.

საქართველოს მართლმადიდებელი ეკლესიის საპატრიარქოს ამ საკითხთან დაკავშირებით ჯერ ოფიციალური პოზიცია არ გაუვრცელებია და ამასთან დაკავშირებით არც სინოდის სხდომა მოუწვევია.

სინოდის სხდომის დროს რუსეთის საპატრიარქომ გადაწყვიტა, რომ უკრაინის საკითხის გამო მსოფლიო პატრიარქს ბართლომე პირველს ლოცვებში აღარ მოიხსენიებდა. ასევე, მის წარმომადგენლებთან ყველანაირ ურთიერთობას წყვეტდა.

ამავე თემაზე: