სომხეთი ვადამდელი საპარლამენტო არჩევნების მოლოდინშია. როგორც BBC-ის რუსული ბიურო წერს, პარლამენტის წინ არჩევნების მოთხოვნით მრავალათასიანი საპროტესტო აქცია გაიმართა. შეკრებილების წინ პრემიერ-მინისტრმა ნიკოლ პაშინიანმა განაცხადა, რომ ყველანაირად ეცდება ვადამდელი საპარლამენტო არჩევნები დაინიშნოს.

სომხეთის პარლამენტმა რიგგარეშე სხდომაზე მეორე მოსმენით მიიღო შესწორებები "ეროვნული კრების რეგლამენტის შესახებ" კანონში, რომელიც დეპუტატებს საშუალებას აძლევს, პარლამენტის დაშლისგან თავი დაიზღვიონ.

ნიკოლ პაშინიანმა განაცხადა, რომ კანონპროექტის მიღება კონტრრევოლუციის ოფიციალურ დაწყებას ნიშნავს. ფრაქცია გასვლის დეპუტატებმა პარლამენტის სხდომას ბოიკოტი გამოუცხადეს. კანონპროექტს მხარი დაუჭირეს რესპუბლიკური პარტიის, დაშნაკცუტიუნისა და ცარუკიანის ბლოკის წარმომადგენლებმა.

კანონპროექტის მიღების შემდეგ პაშინიანმა მოსახლეობას მოუწოდა, რომ ქუჩაში გასულიყვნენ და დეპუტატების გადაწყვეტილება გაეპროტესტებინათ. კანონპროექტის მოწინააღმდეგეებს მიაჩნიათ, რომ პოლიტიკურ ძალებს სურთ, რომ პარლამენტის ვადამდელი არჩევნები არ ჩატარდეს.

სამშაბათს, 2 ოქტომბერს პაშინიანმა გასცა მითითება, რომ დაეთხოვათ ყველა მინისტრი და გუბერნატორი, რომელიც დაშნაკცუტიუნიდან და აყვავებული სომხეთის პარტიებიდან იყვნენ. გვიან ღამით კი პრეზიდენტმა, არმენ სარქისიანმა ამ პარტიებიდან ყველა მინისტრისა და გუბერნატორის დათხოვნის ბრძანებას მოაწერა ხელი.

აქციაზე პაშინიანმა განაცხადა, რომ ბრძანებების ძალაში შესვლისთანავე გადადგება და საქმიანობას, როგორც მოვალეობის შემსრულებელი გააგრძელებს.

"რომ არავინ იფიქროს, რომ მე პრემიერ-მინისტრის თანამდებობას ვუმიზნებ. რვა დღის განმვალობაში პარლამენტმა პრემიერი უნდა აირჩიოს. თუ ამ ხნის განმვალობაში პრემიერი არჩეული არ იქნება, რვა დღეში პრემიერის კიდევ ერთი არჩევნები უნდა ჩატარდეს. თუ ამის შემდეგაც არ აირჩევს პარლამენტი პრემიერს, მაშინ ვადამდელი საპარლამენტო არჩევნები დაინიშნება", — განაცხადა პაშინიანმა. მისი გეგმის შესაბამისად ვადამდელი საპარლამენტო არჩევნები, შესაძლოა, დეკემბერში ჩატარდეს

თავის გეგმებზე საუბრის შემდეგ პაშინიანი პარლამენტში კონკურენტ ფრაქციებთან მოსალაპარაკებლად წავიდა. მოლაპარაკებებიდან დაბრუნების შემდეგ კი პრემიერმა განმარტა, რომ კონკურენტი პარტიები პრემიერის კანდიდატურას არ წარადგენენ.

პაშინიანმა უკვე მოუწოდა პრეზიდენტ არმენ სარქისიანს, რომ სადაო კანონპროექტს ხელი არ მოაწეროს.