აშშ-ის პრეზიდენტის, დონალდ ტრამპის ადმინისტრაციამ გეი დიპლომატებისთვის ვიზების გაცემაზე ახალი რეგულაცია მიიღო. ახალი შეზღუდვის მიხედვით, გეი დიპლომატებისა და ქვეყანაში არსებული საერთაშორისო ორგანიზაციების გეი თანამშრომლების პარტნიორები ვიზას ვერ მიიღებენ თუ ქორწინებაში არ არიან.

სახელმწიფო დეპარტამენტის განმარტებით, ჰომოსექსუალი დიპლომატებისა და საერთაშორისო თანამშრომლების პარტნიორების აპლიკაციებს ისევე განიხილავს, როგორც ჰეტეროსექსუალი პარტნიორების აპლიკაციებს.

როგორც Time წერს, ახალმა რეგულაციამ შეიძლება პრობლემა შეუქმნას ისეთ წყვილებს, რომელთა ქვეყანაშიც გეი ქორწინება კანონიერი არ არის. მსოფლიოს მხოლოდ 25 ქვეყანაშია გეი ქორწინება ლეგალური, ხოლო 70-ზე მეტ ქვეყანაში ჰომოსექსუალური კავშირი დასჯადია. სავალდებულო ქორწინება ქვეყანაში დაბრუნების შემდეგ წყვილებს, შესაძლოა, პატიმრობად შეუბრუნდეთ.

ვიზის გაცემის ცვლილება მიმდინარე წლის ივლისში დაანონსდა და ის ძალაში პირველი ოქტომბრიდან შევიდა. თუ უცხო ქვეყნის მოქალაქე გეი წყვილებს აშშ-ში დარჩენა სურთ, 2018 წლის 31 დეკემბრამდე სახელმწიფო დეპარტამენტში ქორწინების დამადასტურებელი მოწმობა უნდა წარადგინონ. წინააღმდეგ შემთხვევაში ქვეყანა 30 დღის ვადაში უნდა დატოვონ.

სახელმწიფო დეპარტამენტის განმარტებით, ახალი მიდგომა ჰომოსექსუალი და ჰეტეროსექსუალი წყვილებისთვის თანაბარ მიდგომას გულისხმობს. რეგულაციები მალევე გახდა მწვავე კრიტიკის საგანი. გაეროში აშშ-ის ყოფილი ელჩი სამანტა პაუერი ახალ რეგულაციებს სასტიკსა და ფანატიკურს უწოდებს.