ამერიკელი პოლიტიკური ექსპერტი ჯორჯ ფრიდმანი აცხადებს, რომ რუსეთი უკრაინაში შესაჭრელად და ფართო მასშტაბიანი ომის წამოსაწყებად 2017 წელს იქნება მზად.

მისი თქმით, რუსეთის მიერ სირიიდან ჯარის გამოყვანა სირიას საერთოდ არ ეხება და უკრაინის სუვერენიტეტზე მიმდინარე აშშ-რუსეთის მოლაპარაკებების ფარგლებში გადადგმული ერთ-ერთი ნაბიჯი იყო.

ფრიდმანის აზრით, აშშ-ს სახელმწიფო მდივანის, ჯონ კერის ვიზიტი მოსკოვში, მარტის ბოლოს კიდევ ერთი წარუმატებელი ნაბიჯი იყო ამ მოლაპარაკების პროცესში, რადგან ვიზიტიდან მოკლე ხანში აშშ-მ გამოაცხადა, რომ აღმოსავლეთ ევროპაში სამხედრო კონტიგენტს კიდევ გაზრდის.

პენტაგონის განცხადებით, ბალტიის სახელმწიფოებში ერთი ბრიგადის, ხოლო 2017 წელს კიდე ორი ბრიგადის გაგზავნა "რუსეთის აგრესიის შესაჩერებლად" იგეგმება.

ფრიდმანის თქმით, სამხედრო კონტიგენტის ბალტიისპირეთში გაზრდით ამ რეგიონის უსაფრთხოება გაიზრდება და ლიტვა, ლატვია და ესტონეთი რუსეთის აგრესიას თავიდან აიცილებენ, თუმცა ეს ნაბიჯი პუტინის უკრაინულ გეგმებს ხელს არ შეუშლის. რუსეთი ასევე საფრთხედ აღიქვამს ბელორუსის ბოლოდროინდელ პოზიციას, რომლის მიხედვითაც, აშშ მიმდინარე პროცესების მონაწილე უნდა იყოს.

პოლიტოლოგის აზრით, რუსეთის არმია უკრაინაში ფართო მასშტაბიანი სამხედრო მოქმედებებისთვის ჯერ მზად არ არის, თუმცა 2017 წლისთვის პუტინს საკმარისი რესურსი ექნება. ამით შეიძლება აიხსნას აშშ-ს მოქმედებები და რეგიონში ჯარის რაოდენობის გაზრდა. მისივე თქმით, ომი არც ერთ მხარეს უნდა, მაგრამ დაძაბულობა კიდევ უფრო გაიზრდება, რადგან რუსეთი ფიქრობს, რომ აშშ მოთმინებას დაკარგავს და პუტინის შეთავაზებულ პირობებს დათანხმდება, ხოლო აშშ-ს იმედი აქვს, რომ ფინანსურ კრიზისში ჩაფლული რუსეთი იძულებული გახდება უკან დაიხიოს.