2018 წლის პირველი ოქტომბრიდან საქართველოში 15 მიკრონზე ნაკლები სისქის პლასტიკის პარკების წარმოება, იმპორტი და რეალიზაცია იკრძალება. ასევე იკრძალება ოქსოდეგრადირებადი პლასტიკის პარკების წარმოება, იმპორტი და რეალიზაცია.

პლასტიკისა და ბიოდეგრადირებადი პარკების რეგულირების წესი საქართველოს მთავრობამ 2018 წლის 14 სექტემბერს დაამტკიცა. ტექნიკური რეგლამენტი ორ ეტაპად ამოქმედდება. პირველ ჯერზე რეგულაცია 15 მიკრონზე ნაკლები სისქის პლასიკისა და ოქსოდეგრადირებადი პლასტიკის პარკებს შეეხება, ხოლო 2019 წლის 1 აპრილიდან აკრძალვა ყველა ტიპისა და სისქის პლასტიკის პარკებზე გავრცელდება.

ტექნიკური რეგლამენტის მოქმედება ვრცელდება იმ პირებზე, რომლებიც ეწევიან საქართველოს ტერიტორიაზე პლასტიკის პარკების, ოქსოდეგრადირებადი პლასტიკის პარკების, ბიოდეგრადირებადი და კომპოსტირებადი პარკების წარმოებას, იმპორტს ან რეალიზაციას.

პლასტიკის პარკი

პლასტიკისგან დამზადებული პარკი, ხელსაკიდით ან ხელსაკიდის გარეშე, რომელიც მიეწოდება მომხმარებელს საქონლის ან პროდუქტის გაყიდვის ადგილზე.

ოქსოდეგრადირებადი პლასტიკის პარკი

პლასტიკის მასალისგან დამზადებული პარკი, რომელიც შეიცავს დანამატებს, რაც ხელს უწყობს პლასტიკის მასალის მიკროფრაგმენტებად დაშლას.

ბიოდეგრადირებადი და კომპოსტირებადი პარკი

მთლიანად ან ნაწილობრივ ბიოლოგიური, განახლებადი ნედლეულის საფუძველზე წარმოებული, ბიოდეგრადაციასა და კომპოსტირებას დაქვემდებარებული პარკი, რომელიც აკმაყოფილებს ამ ტექნიკური რეგლამენტით დადგენილ მოთხოვნებს და აქვს შესაბამისობის დამადასტურებელი დოკუმენტი.

სანქციები

პლასტიკის პარკების, ბიოდეგრადირებადი და კომპოსტირებადი პარკების წარმოებისას, იმპორტისას და რეალიზაციისას ტექნიკური რეგლამენტის მოთხოვნების დარღვევას აკონტროლებენ:

• გარემოსდაცვითი ზედამხედველობის დეპარტამენტი − პარკების წარმოებისას;
• საქართველოს ფინანსთა სამინისტრო − პარკების იმპორტისას;
• ადგილობრივი თვითმმართველობის ორგანო − პარკების რეალიზაციისას.

ადმინისტრაციული სამართალდარღვევათა კოდექსის მიხედვით, ტექნიკური რეგლამენტის დარღვევის გამო მეწარმე სუბიექტი 500 ლარითა და შესაბამისი პროდუქტის კონფისკაციით დაჯარიმდება, განმეორების შემთხვევაში კი 1000 ლარით, ამ შემთხვევაშიც, შესაბამისი პროდუქტის კონფისკაციით.