საქართველოს ნარკოპოლიტიკის ეროვნული პლატფორმა სხვა ორგანიზაციებთან ერთად დემურ სტურუას გარდაცვალების ფაქტთან დაკავშრებით განცხადებას ავრცელებს.

განცხადებაში ნათქვამია, რომ არსებული ნარკოპოლიტიკა საბჭოთა გადმონაშთია და მხოლოდ ძალოვანი სტრუქტურების კერძო ინსტიტუციურ საჭიროებებს ემსახურება:

"მოვითხოვთ საქართველოს მთავრობისაგან დაუყოვნებლივ დაიწყოს არსებული ნარკოპოლიტიკის და ძალადობრივი პოლიციური სისტემის რეფორმირების პროცესი, რომელიც, როგორც მინიმუმ, მოიცავს დრაკონული ნარკო კანონმდებლობის შეცვლას და ზრუნვის და დახმარების პროგრამების განსახორციელებლად რესურსების მნიშვნელოვან გაზრდას".

სამტრედიის რაიონის სოფელ დაფნარში 8 აგვისტოს 22 წლის ბიჭმა თავი მოიკლა. თვითმკვლელობის მიზეზი სავარაუდოდ პოლიციის მხრიდან ზეწოლაა.

ორგანიზაციები მოითხოვენ აღნიშნული ფაქტის უსწრაფეს და ობიექტურ გამოძიებას და დამნაშავეების კანონის სრული სიმკაცრით დასჯას:

"შეძრწუნებულები ვართ იმ გარემოების გამო, რომ ახალგაზრდა ადამიანმა შესაძლოა თვითმკვლელობით დაასრულა სიცოცხლე პოლიციელების მხრიდან გაუსაძლისი ზეწოლის, მუქარის და ძალადობის შედეგად. მის მიერ დატოვებულ წერილში აღწერილი ვითარება პირდაპირი ანარეკლია იმ რეპრესიული სისტემისა და გავრცელებული პოლიციური პრაქტიკისა, რომელიც ქვეყანაში მოქმედი ნარკოპოლიტიკის პირობებში ჩამოყალიბდა.

არსებული ნარკოპოლიტიკა არის საბჭოთა ტოტალიტარული სისტემის ყველაზე მახინჯი გადმონაშთი, რომელიც მიმართულია მხოლოდ ადამიანების დევნასა და უსამართლო დასჯაზე და ექსკლუზიურად ემსახურება ძალოვანი სტრუქტურების კერძო ინსტიტუციურ საჭიროებებს - იქონიონ ადამიანების დაშინების და დაშანტაჟების მექანიზმი, რათა აიძულონ თანამშრომლობა და ინფორმაციის მიწოდება".

ორგანიზაციები მიიჩნევენ, რომ საქართველოში განხორციელებული სადამსჯელო ნარკოპოლიტიკა არის ირაციონალური და არაჰუმანური, ლახავს ადამიანის უფლებებსა და ღირსებას. მათივე თქმით, ქართულ "მკვლელ" ნარკოპოლიტიკას არ გააჩნია ანალოგი ცივილიზებულ სამყაროში:

"არ არსებობს არანაირი მტკიცებულება ამ პოლიტიკით მიღებული რაიმე დადებითი შედეგების შესახებ. არსებობს მხოლოდ საპირისპირო გამოცდილება და ფაქტები, რომ იგი იწვევს ადამიანების კრიმინალიზაციას, ტანჯვას, სიკვდილს, და საზოგადოებაში ამკვიდრებს უსამართლო და ღირსების შემლახავი საჯარო პოლიტიკის განცდას".

ორგანიზაციების განცხადებით დემურ სტურუას გარდაცვალებაზე პასუხისმგებლობა ეკისრება არა მხოლოდ პოლიციის კონკრეტულ თანამშრომელს, არამედ მთლიანად შინაგან საქმეთა სამინისტროს და საქართველოს ხელისუფლებას:

"საქართველოს ნარკოპოლიტიკის ეროვნული პლატფორმა მზად არის ხელისუფლებას წარუდგინოს საკანონმდებლო ცვლილებების პაკეტი და სერვისების ხარისხის გაუმჯობესების კონკრეტული გეგმა და წვლილი შეიტანოს ქვეყნის ნარკოპოლიტიკის რეფორმის პროცესში".

1. ნარკოტიკების მომხმარებელთა საქართველოს ქსელი (GE-NPUD)
2. თეთრი ხმაურის მოძრაობა
3. 2 ივნისის მოძრაობა
4. დამოკიდებულების კვლევითი ცენტრი - ალტერნატივა ჯორჯია
5. ზიანის შემცირების საქართველოს ქსელი
6. ძალადობისაგან დაცვის ეროვნული ქსელი
7. საქართველოს ფსიქიკური ჯანმრთელობის ასოციაცია
8. საქართველოს ახალგაზრდა იურისტთა ასოციაცია (GYLA)
9. საქართველოს ადიქტოლოგთა ასოციაცია
10. საქართველოს ფსიქიკური ჯანმრთელობის კოალიცია
11. პაციენტთა თემის საკონსულტაციო საბჭო (Ge-CAB)
12. საქართველოს საზოგადოებრივ საქმეთა ინსტიტუტი (GIPA)
13. კონსულტაციისა და ტრენინგის ცენტრი - (CTC)
14. სამედიცინო ცენტრი „ურანტი"
15. კლინიკა "ნეოგენი"
16. ახალი ვექტორი
17. კონსტიტუციის 42-ე მუხლი
18. თანადგომა
19. ჰეპა პლიუსი
20. რუბიკონი
21. ნაბიჯი მომავლისკენ
22. ქალთა საერთაშორისო ორგანიზაცია აკესო
23. ქსენონი
24. კონსტიტუციურ უფლებათა დაცვის ცენტრი
25. რეალური ხალხი რეალური ხედვა
26. პოზიტიური არჩევანი
27. იმედი
28. ფენიქსი 2009
29. ჰერა XXl
30. ახალი გზა
31. გლობალური ინიციატივა ფსიქიატრიაში - თბილისი (GIP)
32. ევროპელი სტუდენტები თავისუფლებისთვის
33. ინიციატივა მოწყვლადი ჯგუფების რეაბილიტაციისთვის
34. საზოგადოებრივი გაერთიანება „ბემონი"
35. დაავადებათა პრევენციის, კონტროლისა და გაუვრცელებლობის ასოციაცია
36. ადამიანის უფლებების სწავლებისა და მონიტორინგის ცენტრი (EMC)
37. საქართველოს წითელი ჯვრის საზოგადოება
38. ფონდი ღია საზოგადოება საქართველო (OSGF)