მუსიკალური პროექტი, საქართველოს ვარსკვლავი, სულ მალე პირველი არხის ეთერში გავა. კონკურსის გამარჯვებული კი 2019 წლის ევროვიზიაზე საქართველოს წარადგენს.

ინფორმაცია ამის შესახებ On.ge-ს პირველი არხის გენერალური დირექტორის მოადგილემ, თიკო ბერძენიშვილმა დაუდასტურა.

"ნოემბერ-დეკემბერში კასტინგებს გამოვაცხადებთ და სავარაუდოდ იანვრიდან ეთერში გავალთ. გამარჯვებული, ანუ საქართველოს ვარსკვლავი ჩვენი ქვეყნის სახელით ევროვიზიაზე გავა", - ამბობს ბერძენიშვილი.

პირველი არხი პროექტს კომპანია ნოვა პროდაქშენთან ერთად განახორციელებს, რომლის მფლობელებიც გიორგი ხაბურზანია და დემნა ჯაფარიძე არიან.

საქართველოს ვარსკვლავი, ისევე როგორც ამ კომპანიის სხვა პროექტები წლების განმავლობაში რუსთავი 2-ის ეთერში გადიოდა, მოგვიანებით კი პროდაქშენის გუნდმა არხი დატოვა და იმედზე გადავიდა.

როგორც ბერძენიშვილი ამბობს, ნოვა პროდაქშენთან მოლაპარაკებები ახლაც მიმდინარეობს და შესაძლოა პირველი არხის ეთერში სულ მალე მათი სხვა პროექტები, მათ შორის ნიჭიერიც ვიხილოთ.