ჯანდაცვის მინისტრის, დავით სერგეენკოს თქმით, ე.წ. სააფთიაქო ნარკომანიის საქმეზე წამლების რეგულირების სააგენტოს ყოფილი უფროსის, გია თვალავაძის დაკავებამ იმოქმედა როგორც სამინისტროს, ისე მინისტრის რეპუტაციაზე. მისივე განმარტებით, მინისტრი არის პასუხისმგებელი ყველა იმ პროცესზე, რომელიც სამინისტროს დაქვემდებარებულ მიმართულებებზე ხდება.

"მე მჯერა, რომ გია თვალავაძე ბუნებით წესიერი კაცია. მინდა ყველას ვთხოვო, სანამ ის ბრალდებულია და სანამ სასამართლოს არ მიუღია საბოლოო გადაწყვეტილება, თავი შეიკავოს შეფასებისგან. იმიტომ, რომ კიდევ ერთხელ ვიძახი გია თვალავაძე წესიერი კაცია და სასამართლო დაადგენს ობიექტურ რეალობას".

სახელმწიფო უსაფრთხოების სამსახურმა ე.წ. სააფთიაქო ნარკომანიის ბრალდებით წამლის რეგულირების სააგენტოს უფროსი, გია თვალავაძე 24 სექტემბერს დააკავა. გუშინ, 26 სექტემბერს თბილისის საქალაქო სასამართლომ აღკვეთის ღონისძიების სახედ პატიმრობა შეუფარდა.

წარდგენილი ბრალდების თანახმად, თვალავაძეს ბრალად ედება სამსახურებრივი უფლებამოსილების ბოროტად გამოყენება. ამ საქმეზე კიდევ ხუთ პირს ბრალად ედებათ უკანონო სამეწარმეო საქმიანობის ჯგუფურად ჩადენა.

როგორც თბილისის საქალაქო სასამართლო განმარტავს, საქმე ეხება აფთიაქების მფლობელების მიერ მატერიალური სარგებლის მიღების მიზნით, განხორციელებულ უკანონო სამეწარმეო საქმიანობას. კერძოდ კი, სხვადასხვა ავტორიზებულ აფთიაქში, სანებართვო პირობების უხეში დარღვევით, რეცეპტის გარეშე ფსიქოტროპული და სპეციალურ კონტროლს დაქვემდებარებული მედიკამენტების რეალიზაციის ფაქტებს.

სასამართლო განმარტავს, რომ გია თვალავაძემ უპირატეს მდგომარეობაში ჩააყენა 15 აფთიაქი, რის საფუძველზეც ამავე სამსახურის ინსპექტირების სამმართველოს მხრიდან, არ მომხდარა რეაგირება აფთიაქების უკანონო საქმიანობაზე.

"სანებართვო პირობების დარღვევაზე არ მომხდარა რეაგირება "სამედიცინო საქმიანობის სახელმწიფო რეგულირების სააგენტოში" შესულ სატელეფონო შეტყობინებებზეც და აფთიაქებს ეძლეოდათ საშუალება უნებართვოდ სისტემატიურად ევაჭრათ ფსიქოტროპული მედიკამენტებით, უკანონოდ მიეღოთ დიდი ოდენობით შემოსავალი, რამაც სახელმწიფოს კანონიერი ინტერესის არსებითი დარღვევა გამოიწვია", — ნათქვამია განცხადებაში.