სახელმწიფო უსაფრთხოების სამსახურმა ე.წ. სააფთიაქო ნარკომანიის ბრალდებით წამლის რეგულირების სააგენტოს უფროსი, გია თვალავაძე დააკავა. ამის შესახებ ინფორმაცია სუს-ის ბრიფინგზე რამდენიმე წუთის წინ გახდა ცნობილი.

სუს-ის ინფორმაციით, გია თვალავაძე არ რეაგირებდა ცხელ ხაზზე შესულ შეტყობინებებზე, რომელიც სხვადასხვა აფთიაქების მიერ ფსიქოტროპული მედიკამენტების რეცეპტის გარეშე გაყიდვას შეეხებოდა.

უწყების ინფორმაციით, გარდა ამისა, ამავე საქმეზე უკანონო სამეწარმეო საქმიანობაში ჩართვის ბრალდებით საქართველოს 5 მოქალაქეა დაკავებული. სულ კი ამ საქმეზე 20 პირია დაკავებული. სუს-ში აღნიშნეს, რომ მათ წამლების უკანონო რეალიზაციით 4 094 709 ლარი მიიღეს.

"გამოძიებამ დაადგინა, რომ თბილისსა და გორში მდებარე 15 სააფთიაქო დაწესებულებაში უკონტროლოდ ხორციელდებოდა ფსიქოტროპული საშუალებების რეალიზაცია", — აღნიშნა სუს-ის წარმომადგენელმა ბრიფინგზე.

საქმეზე გამოძიება სისხლის სამართლის კოსექსის 323 მუხლის პირველი ნაწილითა და 192-ე მუხლის მეორე ნაწილით მიმდინარეოს.

  • მუხლი 323: მოხელის ან მასთან გათანაბრებული პირის მიერ სამსახურებრივი უფლებამოსილების ბოროტად გამოყენება საჯარო ინტერესის საწინააღმდეგოდ, თავისთვის ან სხვისთვის რაიმე გამორჩენის ან უპირატესობის მისაღებად, რამაც ფიზიკური ან იურიდიული პირის უფლების, საზოგადოების ან სახელმწიფოს კანონიერი ინტერესის არსებითი დარღვევა გამოიწვია ისჯება ჯარიმით ან შინაპატიმრობით ვადით ექვსი თვიდან ორ წლამდე ანდა თავისუფლების აღკვეთით ვადით სამ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე;
  • მუხლი 192: ჯგუფურად სამეწარმეო საქმიანობა რეგისტრაციის, ნებართვის ან ლიცენზიის გარეშე ანდა სანებართვო ან სალიცენზიო პირობების დარღვევით, რამაც მნიშვნელოვანი ზიანი გამოიწვია ან რასაც თან ახლდა დიდი ოდენობით შემოსავლის მიღება ისჯება ჯარიმით ან თავისუფლების აღკვეთით ვადით სამიდან ხუთ წლამდე.