შინაგან საქმეთა სამინისტროს ცნობით, მიცკევიჩის ქუჩაზე 40 წლამდე კაცის განზრახ მკვლელობის მცდელობისა და იარაღის შეძენა-შენახვა-ტარების ბრალდებით, 1976 წელს დაბადებული პირი დააკავეს.

შსს-ს განცხადებით, ბრალდებულმა მიცკევიჩის ქუჩაზე მდებარე ერთ-ერთი საცხოვრებელი კორპუსის სადარბაზოში ცეცხლსასროლი იარაღით კაცი დაჭრა და შემთხვევის ადგილიდან მიიმალა.

სასწრაფო-სამედიცინო დახმარების ბრიგადის თანამშრომლებმა დაჭრილი საავადმყოფოში გადაიყვანეს.

შემთხვევა დღეს, 23 სექტემბერს მოხდა. სამართალდამცველებმა ბრალდებული მომხდარიდან რამდენიმე წუთში დააკავეს. საქმეზე გამოძიება მიმდინარეობს განზრახ მკვლელობის მცდელობისა და ცეცხლსასროლი იარაღის მართლსაწინააღმდეგო შეძენა-შენახვა-ტარების მუხლებით. დანაშაული 7-დან 15 წლამდე ვადით თავისუფლების აღკვეთას ითვალისწინებს.