პრემიერ-მინისტრმა, მამუკა ბახტაძემ ოპოზიციურ პარტია სახელმწიფო ხალხისთვის მხარდამჭერთა სიაში თავისი ხელმოწერის აღმოჩენას გამოეხმაურა.

"შეფასება აქ შეიძლება იყოს მხოლოდ ერთი, რომ, სამწუხაროდ, ზოგიერთი ოპოზიციური ძალა აგრძელებს იმ უმსგავსობას, რასაც ჩადიოდა მაშინ, როცა იყო ხელისუფლებაში. ეს არის სრული უმსგავსობა, უპასუხისმგებლობა. სიტყვებიც კი არ მყოფნის, რომ ამას სახელი დავარქვა", — განაცხადა პრემიერმა.

ცენტრალურმა საარჩევნო კომისიამ პარტია სახელმწიფო ხალხისთვის მიერ წარდგენილ სიაში პრემიერის მონაცემები და ხელმოწერა აღმოაჩინა და ამ მიზეზით პროკურატურას მიმართა. პროკურატურამ შესაძლო გაყალბების საქმეზე სისხლის სამართლის კოდექსის 362-ე მუხლის პირველი ნაწილით დაიწყო გამოძიება.

აღნიშნული მუხლი ყალბი პირადობის მოწმობის ან სხვა ოფიციალური დოკუმენტის, ბეჭდის, შტამპის ან ბლანკის დამზადებას, შეძენა-შენახვა, გასაღებას ან გამოყენებას გულისხმობს და ისჯება ჯარიმით ან თავისუფლების აღკვეთით ვადით სამ წლამდე.