თბილისში პარასკევსა და შაბათს ღამეს 00:00 საათიდან 06:00 საათამდე, როცა მეტრო ჩერდება, "ღამის ავტობუსი" დაიწყებს მოძრაობას. ამის შესახებ ინფორმაციას თბილისის მერია ავრცელებს.

თბილისის მერის, კახა კალაძის ინფორმაციით, ეს არის საპილოტე პროექტი, რომელიც თბილისის "ღამის ეკონომიკის" ფარგლებში კეთდება. საპილოტე მარშრუტზე მანის მარკის ავტობუსები ერთსაათიანი ინტერვალით და სტანდარტული — 50-თეთრიანი ტარიფით იმოძრავებენ. მგზავრებს შეეძლებათ შეღავათიანი ტარიფით სარგებლობაც.

ავტობუსები გაივლიან შემდეგ გაჩერებებს:

  • მეტროსადგური ახმეტელის თეატრი;
  • ფარნავაზ მეფის გამზირი (ჰიპერმარკეტი გუდვილი);
  • მტკვრის მარჯვენა სანაპიროს და გიორგი სააკაძის I გასასვლელის გადაკვეთა;
  • ვახუშტი ბაგრატიონისა და რაფაელ აგლაძის ქუჩების გადაკვეთა;
  • სტადიონი დინამო არენა;
  • დავით აღმაშენებლის გამზირი #106;
  • პირველი რესპუბლიკის მოედანი;
  • მეტროსადგური თავისუფლების მოედანი;
  • ნიკოლოზ ბარათაშვილის ქ. კონკა;
  • ევროპის მოედანი;
  • ვახტანგ გორგასალის ქ. #7 — აბანოებთან;
  • დოდაშვილის მოედანი;
  • მეტროსადგური ისანი;
  • მეტროსადგური ვარკეთილი.

ავტობუსის სრული მარშრუტი

ავტობუსი მოძრაობას მეტროსადგურ ახმეტელიდან დაიწყებს და პირველი გაჩერება დიდ დიღომში, სუპერმარკეტ გუდვილთან ექნება. შემდეგ გაივლის აღმაშენებლის ხეივანს, მარშალ გელოვანის გამზირს, მტკვრის მარჯვენა სანაპიროსა და სააკაძის I გასასვლელთან გაჩერდება;

შემდეგ ვახუშტის ხიდს გადაკვეთს და მგზავრებს ვახუშტის ქუჩაზე და დინამო არენასთან მიიყვანს, საიდანაც გზას აღმაშენებლის გამზირზე განაგრძობს და მეტროსადგურ მარჯანიშვილის მიმდებარედ გაჩერდება.

შემდეგ, ის გაივლის მარჯანიშვილისა და ჯავახიშვილის (ყოფ. ელბაქიძის დაღმართი) ქუჩებს და მგზავრებს ჯერ პირველი რესპუბლიკის მოედანზე გაუჩერებს, ხოლო შემდეგ - თავისუფლების მოედანსა და ბარათაშვილის ქუჩაზე — კონკასთან. ავტობუსი გადაკვეთს ბარათაშვილის ხიდს და მგზავრებს ევროპის მოედანზე მიიყვანს. მოგვიანებით გზას გორგასალისა და გულუას ქუჩებისკენ განაგრძობს და აბანოებთან გაჩერდება. ორთაჭალის გავლის შემდგომ, ავტობუსს მორიგი გაჩერებები ექნება დოდაშვილის მოედანსა და მეტრო ისანთან. ავტობუსი კახეთის გზატკეცილით ჯავახეთის ქუჩას დაუკავშირდება და მოძრაობას მეტრო ვარკეთილთან დაასრულებს.

ავტობუსი უკუმიმართულებითაც ანალოგიურ მარშრუტს გაივლის. ავტობუსს ექნება წარწერა — "ღამის ავტობუსი".