პატრიოტთა ალიანსის ლიდერის, ირმა ინაშვილის თქმით, ნატო ჩხეიძის გადაწყვეტილებას არ ელოდა. 17 სექტემბერს, გადაცემა არჩევანში ცნობილი გახდა, რომ ჩხეიძე საპარლამენტო ფრაქცია საქართველოს პატრიოტებს ტოვებს.

"არავითარი დაპირისპირება ამ ორი წლის მანძილზე ჩვენს შორის არ ყოფილა. თუ ქალბატონი ნატო ჩხეიძე დატოვებს ჩვენს ფრაქციას, ცხადია დაიშლება ჩვენი ფრაქცია, მაგრამ ჩვენ გვაქვს გეგმა და ვიმოქმედებთ ამ გეგმის თანახმად", — ამის შესახებ ინაშვილმა რუსთავი 2-თან ისაუბრა.

როგორც ჩხეიძემ განმარტა, ფრაქციის დატოვების შესახებ ის განცხადებას სესიაზე გააკეთებს და თვითონ დამოუკიდებელ დეპუტატად დარჩება:

"საქართველოს პარლამენტში აუცილებლად მოინახება ერთი დეპუტატი მაინც, რომ ფრაქცია არ დაიშალოს და გააგრძელონ ჩვეული მოღვაწეობა".