ონლაინგამოცემა ლიბერალის რედაქტორს, ზურა ვარდიაშვილს დაახლეობით 7 ადამიანი თავს დაესხა და ფიზიკურად გაუსწორდა. ჟურნალისტის თქმით, მიიღო დაზიანებებლი სახისა და თავის არეში.

როგორც ვარდიაშვილმა On.ge-ს განუცხადა, შემთხვევა 2 დღის წინ, 15 სექტემბერს, საღამოს მოხდა. მისი თქმით, თავს ვარკეთილში, ავტოფარეხთან ის პირები დაესხნენ, რომლებიც მანქანის მყიდველებად გაეცნენ.

როგორც On.ge-ს შინაგან საქმეთა სამინისტროში განუცხადეს, თავდამსხმელები იდენტიფიცირებული არიან, თუმცა დაკავებული არავინაა. გამოძიება თავდასხმის მოტივებზე არ საუბრობს, ვარდიაშვილი კი გამომძიებლის მონაყოლს იხსენებს. ჟურნალისტის თქმით, ის სხვა ზურა ვარდიაშვილში ან იმ პირში შეეშალათ, რომელიც თავს ვარდიაშვილად ასაღებდა.

ლიბერალის რედაქტორის მონაყოლიდან ირკვევა, რომ ის არამხოლოდ თავდამსხმელებს, თავად გამომძიებლებსაც სხვა პირი ეგონათ. ჟურნალისტის თქმით, დაკითხვისას გამომძიებელი უმტკიცებდა, რომ მას ჰქონდა ვიდეომასალა, რომელშიც ჩანდა როგორც იჩხუბა მან პარასკევს, 14 სექტემბერს მაღაზია კარფურში,სადაც დედასთან ერთად იმყოფებოდა. მათივე განმარტებით, სწორედ ამ შემთხვევის გამო მოხდა ანგარიშსწორება.

როგორც ვარდიაშვილმა On.ge-ს განაცხადა აღნიშნულ დღეს ის კარფურში არ იმყოფებოდა და ამის მტკიცებულებაც აქვს. მისივე თქმით, ეს გამომძიებლებმაც აღიარეს.

On.ge-ს შინაგან საქმეთა სამინისტროში ამ დეტალებზე არ ესაუბრეს. მათი განცხადებით, საქმეზე გამოძიება სისხლის სამართლის კოდექსის 126-ე მუხლით მიმდინარეობს, რაც ძალადობას გულისხმობს. მათივე თქმით, მიუხედავად იმისა რომ თავდამსხმელები იდენტიფიცირებული არიან მიმდინარეობს რიგი საგამოძიებო მოქმედებები, რის გამოც ისინი ამ დრომდე არ დაუკავებიათ. სხვა საკითხებზე უწყებაში ამ ეტაპზე არ საუბრობენ.