საქართველოს განათლების, მეცნიერების, კულტურისა და სპორტის მინისტრმა, მიხეილ ბატიაშვილმა გამოცდების ეროვნული ცენტრის ხელმძღვანელი, მაია მიმინოშვილი და განათლების ხარისხის განვითარების ცენტრის დირექტორი, თამარ სანიკიძე თანამდებობიდან გაათავისუფლა. ამის შესახებ ინფორმაცია მინისტრმა საგანგებო ბრიფინგზე გაასაჯაროვა.

თამარ სანიკიძისა და მაია მიმინოშვილის გარდა თანამდებობიდან გაათავისუფლეს განათლების, მეცნიერების, კულტურისა და სპორტის მინისტრის მოადგილეები, თემურ მურღულია და ლია გიგაური.

მინისტრის განცხადებით, თანამდებობიდან ასევე გაათავისუფლეს მასწავლებელთა პროფესიული განვითარების ეროვნული ცენტრის დირექტორი, გიორგი მაჩაბელი და შოთა რუსთაველის ეროვნული სამეცნიერო ფონდის დირექტორი, მანანა მიქაბერიძე. სამინისტროში მოადგილეების რაოდენობა 7-დან 5-მდე შემცირდა.

მინისტრმა მასშტაბური საკადრო ცვლილებები სისტემაში არსებული პრობლემებით ახსნა:

"სისტემაში არსებულ პრობლემებთან დკავშირებით გავაკეთე განცხადება. პირველივე დღიდან სისტემაში პრობლემებს ვხედავდი. ეს არ არის საბოლოო და ცვლილებები გაგრძელდება. ეს არის მნიშვნელოვანი წინაპირობა, რომ უსწრაფესი ნაბიჯებით დავიწყოთ ნაბიჯების განხორციელება. ახალმა გუნდმა ახალი ენერგიით უნდა შეძლოს პრობლემების გადაჭრა", - განაცხადა მიხეილ ბატიაშვილმა.

On.ge გამოცდების ეროვნულ ცენტრს დაუკავშირდა, სადაც განგვიცხადეს, რომ მაია მიმინოშვილი მინისტრის გადაწყვეტილებასთან დაკავშირებით, განმარტებას არ გააკეთებს.

თამარ სანიკიძე

თამარ სანიკიძე 2016 წლიდან განათლების ხარისხის განვითარების ცენტრს ხელმძღვანელობდა. მანამდე ის განათლებისა და მეცნიერების მინისტრი იყო. მისი სამწლიანი მოღვაწეობა განათლების მინისტრის პოსტზე 2016 წლის 3 ივნისს დასრულდა. საკინიძე ალექსანდრე ჯეჯელავამ შეცვალა.

თამარ სანიკიძის მინისტრობის პერიოდს უკავშირდება აუდიტორია #115-ის მასშტაბური პროტესტი. აუდიტორია #115 უმაღლესი განათლების სისტემას აპროტესტებდა და თვითმმართველობის არსებული რეფორმის ცვლილებას ითხოვდა. მათი თქმით, უნივერსიტეტებში ე.წ. ოდეერების ინსტიტუტი ისევ არსებობს და ხელისუფლება უნივერსიტეტის საქმიანობაში ერევა.

მაია მიმინოშვილი

მაია მიმინოშვილი გამოცდების ეროვნული ცენტრის დირექტორის თანამდებობას 2002 წლიდან იკავებდა. 2007 წელს დაინიშნა განათლებისა და მეცნიერების მინისტრად. 2008 წლიდან დღემდე ის კვლავ გამოცდების ეროვნულ ცენტრს ხელმძღვანელობდა.