ანტიტერორისტული სპეცოპერაციის დროს, კანადის პოლიციამ ტერორიზმში ბრალდებული პირი მოკლა. ინფორმაციას BBC ავრცელებს.

ოპერაცია ონტარიოს პროვინციაში ჩატარდა. 24 წლის აარონ დრაივერი შარშან დაკავებული იყო ინტერნეტში ტერორიზმის ღია მხარდაჭერისთვის.

აარონ დრაივერი სასამართლოს შენობას ტოვებს. 2 თებერვალი, 2016 წელი.

ფოტო: AP

ადგილობრივი პრესა პოლიციის თანამშრომლებზე დაყრდნობით იუწყება, რომ გარდაცვლილს მანქანაში თვითნაკეთი ბომბი ჰქონდა დამონტაჟებული და საზოგადოებრივი თავშეყრის ადგილას აპირებდა თავის აფეთქებას.

სამართალდამცავები აცხადებენ, რომ მათ მიიღეს ზუსტი ინფორმაცია შესაძლო ტერაქტის შესახებ და მოახდინეს სწრაფი რეაგირება, რის შედეგადაც ტერაქტის საფრთხე აღმოიფხვრა.