სამხრეთ ოსეთის დე ფაქტო რესპუბლიკის შინაგან საქმეთა მინისტრის, დიმიტრი მედოევის თქმით, სირია და ცხინვალის რეგიონი საელჩოების გახსნას განიხილავენ. მისივე თქმით, მსგავს პროცესებს დიდი დრო სჭირდება.

მედოევმა, ასევე, დაამატა, რომ ცხინვალში სირიის დელეგაციის ჩასვლას ელოდებიან, რათა თანამშრომლობის პრიორიტეტული მიმართულებები განიხილონ.

სირიამ რუსეთისგან ოკუპირებული სამხრეთ ოსეთი და აფხაზეთი დამოუკიდებელ რესპუბლიკებად 2018 წლის მაისის ბოლოს აღიარა. საქართველომ კი პასუხად სირიასთან დიპლომატიური ურთიერთობა გაწყვიტა. სამხრეთ ოსეთის და აფხაზეთის დე ფაქტო რესპუბლიკა მანამდე აღიარა რუსეთმა, ნიკარაგუამ, ნაურუმ და ვენესუალამ.

ოკუპირებული ტერიტორიების აღიარების გამო აშშ-მ სირიას შეზღუდვები დაუწესა. ჩანაწერის შესაბამისად, აშშ-ს ბიუჯეტიდან გამოყოფილი დაფინანსებით ვერ ისარგებლებს იმ ქვეყნის ცენტრალური მთავრობა, რომლის შესახებაც აშშ-ის სახელმწიფო მდივანი დაადგენს და ასიგნებების კომიტეტს წარუდგენს ანგარიშს, რომ აღნიშნულმა ქვეყანამ აღიარა რუსეთის მიერ ოკუპირებული აფხაზეთისა და ცხინვალის რეგიონის ე.წ. დამოუკიდებლობა, ან მათთან დაამყარა დიპლომატიური ურთიერთობები.