დღეს ბათუმში რუსთავი 2-სა და TV-საქართველოს ადვოკატებმა საკონსტიტუციო სასამართლოს პირდაპირ ეთერში მიმართეს. ისინი სასამართლოს კანონის ფარგლებში მოქმედებისკენ მოუწოდებენ.

როგორც ადვოკატი დიმიტრი ძაგნიძე აცხადებს, საკონსტიტუციო სასამართლო ვალდებული იყო გადაწყვეტილება ცხრა თვის ვადაში გამოეტანა, თუმცა ეს ვადა უკვე გასულია.

ადვოკატების თქმით, მათთვის სრულიად გაურკვეველია, თუ რატომ ჭიანურდება ორგზის განხილულ საქმეებზე გადაწყვეტილების მიღება. ისინი მოუწოდებენ საკონსტიტუციო სასამართლოს, ნუ აჰყვებიან სახელმწიფოს მხრიდან ძალმომრეობას.

სასამართლოს მიმართა ასევე ადვოკატმა ზაზა ბიბილაშვილმაც:

"ნუ დაემორჩილებით იმ ადამიანების, იმ ანტისახელმწიფოებრივი ძალის შანტაჟს, რომლებმაც ქურდულად შუაღამისას სპეციალურად მიიღეს კანონი, იმისთვის , რომ ეს ინსტიტუცია დაენგრიათ".

საკითხს ეხმიანება არასამთავრობო ორგანიზაცია საერთაშორისო გამჭვირვალობა საქართველოს აღმასრულებელი დირექტორი ეკა გიგაურიც, რომელიც აცხადებს, რომ ეს საკითხი უკავშირდება არჩევნებს და მედიის თავისუფლებას და სწორედ ამიტომ, საკონსტიტუციო სასამართლომ საქმეზე განსაკუთრებული აქცენტი უნდა გააკეთოს.

რუსთავი 2-ის ადვოკატები აცხადებენ, რომ თუ საჭირო გახდა, უზენაეს სასამართლოშიც იბრძოლებენ.