იაპონია საქართველოსთან სავიზო რეჟიმს ამარტივებს. ამის შესახებ დღეს თბილისში გამართულ პრესკონფერენციაზე იაპონიის საგარეო საქმეთა მინისტრმა, ტარო კონომ განაცხადა. გარდა ამისა, იაპონია გეგმავს, გაცვლითი პროგრამების საშუალებით, ხელი შეუწყოს ახალგაზრდა დიპლომატების, იურისტების და სხვა ექსპერტების განვითარებას.

იაპონიის საგარეო საქმეთა მინისტრის ვიზიტის ფარგლებში გაფორმდა შეთანხმება აღმოსავლეთ-დასავლეთის ჩქაროსნული ავტომაგისტრალის გაუმჯობესების პროექტის (ფაზა 2) თაობაზე. პროექტის თანახმად იაპონიის მთავრობა იაპონიის საერთაშორისო თანამშრომლობის სააგენტოს (Japan International Cooperation Agency, JICA) მეშვეობით გამოყოფს 38.735.000.000 იაპონური იენის ოდენობის დაფინანსებას (დაახლოებით 343 მლნ აშშ დოლარი) ავტომაგისტრალის შორაპანი-არგვეთას მონაკვეთის საავტომობილო გზის (14.7 კმ.) მშენებლობისთვის.

საქართველოს საგარეო საქმეთა მინისტრის, დავით ზალკალიანის განცხადებით, პოლიტიკურ დონეზე მიაღწიეს შეთანხმებას საქართველოსა და იაპონიას შორის ორმხრივი საინვესტიციო ხელშეკრულების ძირითად პრინციპებზე.