საქალაქო სასამართლო ფაშისტური დაჯგუფების ლიდერის, გიორგი ჭელიძის აღკვეთის ღონისძიების საკითხზე მსჯელობს. მას ბრალად იარაღის უკანონო შეძენა-შენახვა-ტარება ედება.

დაცვის მხარე ჭელიძის დარბაზიდან გათავისუფლებას მოითხოვს და აცხადებს, რომ ჭელიძეს სროლის უფლება ჰქონდა:

"გამოხატვის თავისუფლების შეზღუდვაა. უნდა ტყეში გაისვრის საბრძოლო ვაზნას და თუ უნდათ სპორტულ სტენდზე, თუ სახელმწიფოს ტირანიას არ აიძულებთ", — განაცხადა ადვოკატმა.

დაცვის მხარის განცხადებით, ჭელიძის მიმართ საქმის წარმოება პოლიტიკური ზეწოლაა, რადგან მან მიიღო გაფრთხილება ფაშისტური სიმბოლიკის ტარების შესახებ:

"გიგა ჭელიძეს და მის ორგანიზაციას აქვს ქართული ეთნოგრაფიიდან ამოღებული სიმბოლიკა. ეს არის ბორჯღალო და ბოლნური ჯვარი", — განაცხადა დაცვის მხარემ.

გიორგი ჭელიძეს ექვსი ადვოკატი იცავს. ადვოკატები მის გათავისუფლებას 1 000-ლარიანი გირაოთი ითხოვენ, 40 დღეში გადახდის ვადით.

პროკურორების თქმით, არსებობს ბრალდებულის მიმალვის, მოწმეებზე ზემოქმედებისა და მტკიცებულებების განადგურების საფრთხე. სასამართლო პროცესზე, საქმის პროკურორმა განაცხადა, რომ ჭელიძის სახლში პოლიციის მისვლისას მან საპირფარეშოში უნიტაზი მოგლიჯა და ვაზნები შიგნით ჩაყარა. მისივე თქმით, ჭელიძემ ვაზნების სრულად ჩარეცხვა ვერ მოასწრო.

მიმდინარე წლის 31 აგვისტოს, სამართალდამცველებმა გამოძიება სოციალურ ქსელში მოძრაობა საქართველოს ეროვნული ერთობის გვერდზე გავრცელებული ვიდეოს საფუძველზე დაიწყეს. ვიდეოში, რომელიც ფაშისტურმა დაჯგუფებამ სოციალურ ქსელში გაავრცელა, ჩანს თუ როგორ ვარჯიშობენ იარაღის სროლაში ორგანიზაციის აქტივისტები.

ჭელიძის დაკავების შემდეგ ფაშისტური მოძრაობის ფეისბუქგვერდი წაიშალა. სწორედ აღნიშნულ გვერდზე გამოქვეყნებული ვიდეოების საფუძველზე დაიწყო შსს-მ გამოძიება.