შინაგან საქმეთა სამინისტრომ ფაშისტური მოძრაობის, "საქართველოს ეროვნული ერთობის'" სოციალურ გვერდზე გავრცელებულ ვიდეოსთან დაკავშირებით გამოძიება დაიწყო.

გამოძიება სისხლის სამართლის კოდექსის 236-ე მუხლით მიმდინარეობს, რაც ცეცხლსასროლი იარაღის მართლსაწინააღმდეგოდ შეძენა-შენახვა-ტარებას გულისხმობს.

ვიდეოში, რომელიც ფაშისტურმა დაჯგუფებამ სოციალურ ქსელში გაავრცელა, ჩანს თუ როგორ ვარჯიშობენ იარაღის სროლაში ორგანიზაციის აქტივისტები.

"ფაშისტური კვირადღე. ქართველი მამრი კვირაში მინიმუმ ერთ დღეს უნდა უთმობდეს სპორტულ და საბრძოლო მომზადებას. ჩვენი მოძრაობის ,"შავპერანგიანები" ყოველ კვირას რეგულარულად ვარჯიშობენ ბუნების წიაღში...", - ვკითხულობთ ორგანიზაციის ფეისბუქგვერდზე.

აღნიშნული გამოძიების ფარგლებში, შსს ეროვნული ერთობის ერთ-ერთი ლიდერის, გიორგი ჭელიძის ფეისბუქგვერდზე გამოქვეყნებული ფოტოთი და მუქარის შემცველი ტექსტითაც დაინტერესდება. გიორგი ჭელიძე ემუქრება იმ პირებს, რომლებმა ქართველ ფეხბურთელ გურამ კაშიას მხარდაჭერა გამოუცხადეს. შსს-ს ცნობით, გამოძიება შესაძლოა გადაკვალიფიცირდეს.

ეს პირველი შემთხვევა არ არის, როცა შსს მოძრაობის წევრების ვიდეოებზე გამოძიებას იწყებს. ერთ–ერთი მსგავსი ვიდეოს გამო შსს–მ 16 აპრილს იარაღის უკანონოდ შეძენა–შენახვის მუხლით გამოძიება დაიწყო, თუმცა 4 მაისს განაცხადა, რომ ეს იარაღები პნევმატური იყო. გამოძიება შეწყდა.

ფაშისტური მოძრაობა "საქართველოს ეროვნული ერთობა” 2016 წლის 2 ნოემბერს დაფუძნდა. მათი ლიდერის, გიორგი ჭელიძის თქმით, მოძრაობის წევრებს სჯერათ პატრიარქატის, თუმცა თავის გაერთიანებაში ქალებსაც იღებენ. მათ, 12-13 მაისს, ნარკოპოლიტიკის შეცვლის მოთხოვნით გამართული აქციები გააპროტესტეს. თავის გამოსვლები ორგანიზაციის წევრები ქსენოფობიურ და ჰომოფობიურ განცხადებებს აკეთებენ, ავრცელებენ სიძულვილის ენას.