ფაშისტურმა მოძრაობის, საქართველოს ეროვნული ერთობის ფეისბუქგვერდი, მისი ლიდერის გიორგი ჭელიძის დაკავების შემდეგ წაშლილია. სწორედ აღნიშნულ გვერდზე გამოქვეყნებული ვიდეოების საფუძველზე დაიწყო შსს-მ გამოძიება იარაღის უკანონო შეძენა-შენახვა-ტარების მუხლით.

ფეისბუქზე მოძრაობის სახელწოდებით მხოლოდ დახურული ჯგუფი იძებნება, რაც შეეხება ვიდეობს, სადაც ჩანს, როგორ ისვრიან მოძრაობის წევრები, ფეისბუქის მომხმარებლებისთვის ამჟამად მიუწვდომელია.

სოციალურ ქსელში ჯერჯერობით იძებნება დაკავებულის, გიორგი ჭელიძის ფეისბუქგვერდის მისამართი.

შინაგან საქმეთა სამინისტომ ცეცხლსასროლი იარაღის და საბრძოლო მასალის მართლსაწინააღმდეგო შეძენა-შენახვა-ტარების ბრალდებით, "საქართველოს ეროვნული ერთობის" ლიდერი გიორგი ჭელიძე პირველ სექტემბერს დააკავა

შსს-ს ცნობით, ბრალდება 2-დან 5 წლამდე თავისუფლების აღკვეთას ითვალისწინებს.

მიმდინარე წლის 31 აგვისტოს, სამართალდამცველებმა გამოძიება სოციალურ ქსელში მოძრაობა საქართველოს ეროვნული ერთობის გვერდზე გავრცელებული ვიდეოს საფუძველზე დაიწყეს.

"პოლიციამ ბრალდებულის საცხოვრებელი ბინის ჩხრეკისას სხვადასხვა ტიპის იარაღი და 28 ვაზნა ნივთმტკიცებად ამოიღო, რაზეც დანიშნულია შესაბამისი ექსპერტიზები", — ნათქვამია განცხადებაში.

გამოძიება სისხლის სამართლის კოდექსის 236-ე მუხლით მიმდინარეობს, რაც ცეცხლსასროლი იარაღის და საბრძოლო მასალის მართლსაწინააღმდეგოდ შეძენა-შენახვა-ტარებას გულისხმობს.