მიანმარში Reuters-ის ორ ჟურნალისტს შვიდწლიანი პატიმრობა მიუსაჯეს. ქვეყნის ხელისუფლება ამბობს, რომ ჟურნალისტებმა სახელმწიფო საიდუმლოება უკანონოდ მოიპოვეს. ჟურნალისტები ვა ლონი და კია სო ონი მიანმარში სამხედროების მიერ როჰინჯი მოსახლეობის დევნას აშუქებდნენ.

როგორც Reuters წერს, 2017 წლის დეკემბერში დაკავებისას მათ "საიდუმლო დოკუმენტები აღმოუჩინეს". როგორც ინფორმაცია ვრცელდება, დოკუმენტები რაქჰაინის რეგიონის უსაფრთხოებას ეხებოდა.

სასამართლოზე ჟურნალისტებმა განაცხადეს, რომ დოკუმენტები რესტორანში პოლიციელებთან შეხვედრისას მიიღეს, რის შემდეგაც მომენტალურად დააკავეს. ერთ-ერთმა პოლიციელმა განაცხადა, რომ ყველაფერი ორგანიზებული იყო, რათა ჟურნალისტებისთვის გაშუქებაში ხელი შეეშალათ.

"დღეს სამწუხარო დღეა მიანმარისთვის, მსჯავრდებული ჟურნალისტებისთვის და მსოფლიო პრესისთვის", - განაცხადა Reuters-ის მთავარმა რედაქტორმა და დაამატა, რომ გამოცემა დახმარებისთვის საერთაშორისო საზოგადოებას მიმართავს.

მიანმარის ხელისუფლება მუსლიმ როჰინჯებს რამდენიმე წელია დევნის. 2016 წლიდან კონფლიქტში ქვეყნის არმია ჩაერთო. გაერომ სამხედროები როჰინჯების გენოციდში დაადანაშაულა. მიანმარის ხელისუფლება ყველაფერს უარყოფს.