გაერთიანებული ერების ორგანიზაციის დასკვნის მიხედვით, მიანმარის სამხედრო ლიდერებმა როჰინჯების გენოციდისთვის პასუხი უნდა აგონ. გაეროს დასკვნაში ნათქვამია, რომ მიანმარის რმია პასუხისმგებელია სამხედრო და კაცობრიობის წინაშე ჩადენილ დანაშაულებებზე.

გაეროს თქმით, მიანმარის სამხედრო ძალებმა საერთაშორისო სამართალი დაარღვია და "უდიდესი დანაშაული" ჩაიდინა რაქჰანშის, კაშინისა და შანშის პროვინციებში.

გაეროს გამომძიებლებმა 875 მსხვერპლი გამოჰკითხეს, რომლებიც მიანმარიდან გაიქცნენ. მათ აღმოაჩინეს, რომ სამხედროები განურჩევლად კლავდნენ ადამიანებს, აუპატიურებდნენ ქალებს, თავს ესხმოდნენ ბავშვებს და წვავდნენ სოფლებს. ანგარიშში ნათქვამია, რომ ამ და სხვა ძალადობრივ ქმედებებთან ერთად მიანმარის სამხედრო ძალებმა კაცობრიობის წინაშე დანაშაული ჩაიდინა.

რაქჰანის ჩრდილოეთით კი გაეროს გამომძიებლებმა მასობრივი მკვლელობისა და დეპორტაციის ფაქტები აღმოაჩინეს.

მიანმარში გაერომ გამოძიების ჩატარება მარტში გადაწყვიტა. 2017 წლის აგვისტოში განახლდა მიანმარში როჰინჯების წინააღმდეგ ძალადობრივი ქმედებები, რის შედეგადაც 25 ათასი როჰინჯი დაიღუპა, ხოლო 700 ათასი ბანგლადეშში გაიქცა.

გაეროს დასკვნაში მიანმარის სამხედრო ძალების მეთაურის დანაშაულზეც არის საუბარი. ანგარიშის გამოქვეყნების შემდეგ ფეისბუქმა მეთაურთან დაკავშირებული 18 ანგარიში და 52 გვერდი წაშალა, რომლებსაც, დაახლოებით 12 მილიონი გამომწერი ჰყავდა. კომპანიამ განმარტა, რომ არ სურთ, ეთნიკური და რელიგიური შუღლის გაღვივებისთვის, მათი სერვისი გამოიყენონ. გაეროს ანგარიშში ექვსს სამხედრო ლიდერზეა საუბარი.

გაერომ ჰააგის სასამორთლოს მიანმარში გამოძიების ჩატარებისკენ მოუწოდა. ქვეყანას რომის სტატუტისთვის ხელი მოწერილი არ აქვს, ამიტომაც ჰააგის პროკურორები ფიქრობენ, შეუძლიათ თუ არა მიანმარში გამოძიების დაწყება.