საქართველოს მთავარ პროკურატურაში რეორგანიზაცია გამოცხადდა. ამის შესახებ განცხადება საქართველოს პროკურატურის პრესსამსახურმა გაავრცელა.

უწყების ცნობით, მთავარი პროკურორის შალვა თადუმაძის გადაწყვეტილებით, უპირველესად ცვლილებები მთავარი პროკურატურის სტრუქტურულ ერთეულებს შეეხება, რომლებშიც დასაქმებულები არიან საჯარო მოხელეები. ასევე განხორციელდება სისტემაში ხელმძღვანელ თანამდებობაზე მომუშავე პროკურორების ატესტაცია და მრავალკომპონენტიანი შეფასების სისტემა.

განცხადებაში ვკითხულობთ, რომ პირველ ეტაპზე რეორგანიზაცია შეეხება ყველა ოლქის პროკურორს და მათ მოადგილეებს, რაიონის პროკურორებსა და მათ მოადგილეებს, ავტონომიური რესპუბლიკის პროკურორებს და მათ მოადგილეებს, ასევე მთავარი პროკურატურის სტრუქტურული ერთეულების ხელმძღვანელებსა და მოადგილეებს.

შალვა თადუმაძის გადაწყვეტილებით, რეორგანიზაციის პროცესს უხელმძღვანელებს სპეციალურად შექმნილი ჯგუფი, რომელიც ატესტაციას, მრავალკომპონენტიან შეფასებასა და მთავარ პროკურორთან გასაუბრების ორგანიზებას უზრუნველყოფს.

რეორგანიზაციის დასრულებამდე პროკურატურის ხელმძღვანელ თანამდებობაზე მომუშავე პირები დანამატებსა და პრემიებს ვერ მიიღებენ.