პარტია ევროპული საქართველოს პრეზიდენტობის კანდიდატი, დავით ბაქრაძე სრულ მხარდაჭერასა და სოლიდარობას უცხადებს საქართველოს ფეხბურთის ეროვნული ნაკრების კაპიტანს გურამ კაშიას:

"მიუღებელი და დაუშვებელია, როდესაც ღიად პრორუსული და ფაშისტური ძალები დაუფარავად ემუქრებიან ფეხბურთელს, იმის გამო, რომ მან დაგმო ძალადობა და ადამიანებს შორის თანასწორობას დაუჭირა მხარი".

ბაქრაძის თქმით, ხელისუფლების ვალია უზრუნველყოს გურამ კაშიას უსაფრთხოება.

"საქართველოში ერთმანეთთან დაპირისპირებისა და ზიზღის გავრცელება შეიძლება აწყობდეს მხოლოდ ოკუპანტ ძალას, რომელიც დაინტერესებულია ჩვენი ქვეყნისა და საზოგადოების დასუსტებით. ამიტომ, ჩვენი ვალია, წინ აღვუდგეთ აგრესიასა და ძალადობას", - აცხადებს დავით ბაქრაძე.

#გურამშენთანვართ კამპანიის ფარგლებში კაშიას მხარდაჭერა გამოუცხადა ნაკრების ფეხბურთელებმა, გიორგი მერებაშვილმა და გიორგი ქვილითაიამ. კაშიას მხარდაჭერა გამოუცხადეს ქართული სპორტის ქომაგებმაც.

კაშიას მხარდასაჭერად სოციალურ ქსელებში კამპანია #გურამშენთანვართ მას შემდეგ დაიწო, რაც კაშიამ ვერიფიცირებული ფეისბუქგვერდი გააუქმა და ინსტაგრამის ანგარიში დახურა.

ინსტაგრამის სთორიში ქვეყნდება პოსტები ჰეშთეგით #გურამშენთანვართ და @37GK, რაც კაშიას ინსტაგრამის მისამართია. ფეისბუქის მომხმარებლები კი მხარდასაჭერად ჩარჩოს იყენებენ. ჩარჩოს საკუთარ პროფილზე დასაყენებლად დააკლიკეთ აქ.

გასული წლის ოქტომბერში, ფეისბუკზე კაშიას ფოტოს გამოჩნდა, რომელზეც თამაშის დროს, ლგბტ დროშის ფერებში სამკლაური უკეთია. ფოტომ ქართველი მომხმარებლების ნაწილი გააღიზიანა.

რამდენიმე დღის წინ ცნობილი გახდა, რომ უეფა გურამ კაშიას ლგბტ თემის მიმართ გამოხატული მხარდაჭერისთვის დააჯილდოებს. #EqualGame უეფას ახალი ჯილდოა, რომელიც პირველად ქართველ ფეხბურთელს გადაეცა.

გურამ კაშიამ უეფასთან საუბარში განაცხადა, რომ ამ ჯილდოს მიღების გამო ძალიან ამაყობს.

"ვამაყობ, რომ უეფამ #EqualGame-ის ჯილდო მე გადმომცა. მე მჯერა, რომ ყველა ადამიანი თანასწორია, განურჩევლად იმისა, თუ რისი გწამს, ვინ გიყვარს და რას წარმოადგენ... მადლობა უეფას პრეზიდენტს ამ ჯილდოსთვის. სადაც არ უნდა ვითამაშო, ყოველთვის გავაგრძელებ თანასწორობის უფლებების დაცვას", - ამბობს კაშია.