საქართველოს ნაკრების ვიცე-კაპიტანმა და სან ხოსეს ცენტრალურმა მცველმა, გურამ კაშიამ ვერიფიცირებული ფეისბუქგვერდი გააუქმა. კაშიას ამჟამად ინსტაგრამზე დახურული ანგარიში აქვს. როგორც adjarasport წერს, ფეხბურთელს ინსტაგრამის ანგარიში აქამდე ღია ჰქონდა.

გურამ კაშია საქართველოს ეროვნული ნაკრების ვიცე-კაპიტანია. ის აქამდე ნიდერლანდების გუნდ ვიტესის კაპიტანი იყო, ახლა კი აშშ-ში, სან ხოსეს ფეხბურთელია.

გასული წლის ოქტომბერში, ფეისბუკზე მისი ფოტოს გამოჩენამ, რომელზეც თამაშის დროს, ლგბტ დროშის ფერებში სამკლაური უკეთია ქართველი მომხმარებლების ნაწილი გააღიზიანა. მოგვიანებით კაშიამ განაცხადა, რომ ძალადობის წინააღმდეგია და არ ნანობს რაც გააკეთა. თავად სამკლაური კი ცნობიერების ამაღლების კამპანიის ნაწილია.

რამდენიმე დღის წინ ცნობილი გახდა, რომ უეფა გურამ კაშიას ლგბტ თემის მიმართ გამოხატული მხარდაჭერისთვის დააჯილდოებს. #EqualGame უეფას ახალი ჯილდოა, რომელიც პირველად ქართველ ფეხბურთელს გადაეცა.

UEFA-ს ოფიციალურ გვერდზე გურამ კაშიას სტატიაც მიუძღვნეს. სტატიაში ნათქვამია, რომ გურამ კაშიას ჯილდო ლგბტ თემის საჯაროდ მხარდაჭერის გამო გადაეცა. ეს მოიცავდა როგორც განცხადებებს, ისე მოედანზე ლგბტ-ს ფერებში გაკეთებული კაპიტნის სამკლაურის ტარებას. სტატიაში ასევე აღნიშნულია, რომ ამ ჟესტის გამო კაშია სამშობლოში მკაცრად გააკრიტიკეს.

"კაშიას ჟესტი ნეგატიურად და მტრულად მიიღეს მის სამშობლოში. მათ შორის, ადამიანები ითხოვდნენ, რომ კაშია ეროვნული ნაკრებიდანაც მოეკვეთათ. მიუხედავად ამისა, ის არ შეუშინდა მუქარასა და ლანძღვას და განაცხადა, რომ საკუთარ საქციელს არ ნანობს", - აღნიშნულია სტატიაში.

გურამ კაშიამ უეფასთან საუბარში განაცხადა, რომ ამ ჯილდოს მიღების გამო ძალიან ამაყობს.

"ვამაყობ, რომ უეფამ #EqualGame-ის ჯილდო მე გადმომცა. მე მჯერა, რომ ყველა ადამიანი თანასწორია, განურჩევლად იმისა, თუ რისი გწამს, ვინ გიყვარს და რას წარმოადგენ... მადლობა უეფას პრეზიდენტს ამ ჯილდოსთვის. სადაც არ უნდა ვითამაშო, ყოველთვის გავაგრძელებ თანასწორობის უფლებების დაცვას", - ამბობს კაშია.