"ახლა გაიგეთ, რომ ნატოში ჩვენს მიღებას ამ ეტაპზე არ აპირებენ, ხოლო ევროკავშირში მიღების პერსპექტივას არც კი განიხილავენ? პირადად ჩემთვის ორივე სამწუხაროა, მაგრამ ამ მოცემულობაში ვართ დიდი ხანია. მერკელს რატომ უნდა ეთქვა რამე განსხვავებული", - ასე შეაფასა პოლიტოლოგმა, გია ნოდიამ ანგელა მერკელის ვიზიტზე საზოგადოების რეაქცია.

ფეისბუქპოსტში ნოდია წერს, რომ ვიზიტმა ბევრი არაადეკვატური მოლოდინი ამოატივტივა. მისი თქმით, ამ ეტაპზე მნიშვნელოვანია თუნდაც ის, რომ ევროპის ყველაზე გავლენიანი პოლიტიკოსი საქართველოში ჩამოვიდა და თუნდაც ზოგადი განცხადებების დრონეზე მხარდაჭერა გამოხატა. მისივე თქმით, საზოგადოება მზად უნდა ყოფილიყო იმისთვის, რომ პრინციპული სიახლე ამ ვიზიტს არ მოყვებოდა.

"ეს არ ნიშნავს, რომ დასავლეთს "არ ვუნდივართ" და მხარს არ გვიჭერენ: მათი მხარდაჭერის გარეშე საერთოდ არ ვიარსებებდით, როგორც სუვერენული სახელმწიფო. მეტი მხარდაჭერა გვინდა, მაგრამ იმას, რაც უკვე გვაქვს, გადამწყეტი მნიშვნელობა აქვს", - წერს ნოდია.

ნოდია ამბობს, რომ სულელურია ბრალდებები, თითქოს მერკელი პრორუსი პოლიტიკოსია, რადგან ის რუსეთის მიმართ მკაცრი და პრინციპული პოლიტიკის მომხრეა და ერთადერთია დასავლეთ ევროპაში ვისი იმედიც უნდა გვქონდეს:

"იმაში, რომ რუსეთის მიმართ სანქციები ძალაშია, მერკელის დიდი დამსახურებაა. ცხადია, ნორდსტრიმ2-ის პროექტი ამ პრინციპულ პოლიტიკას აშკარად ეწინააღმდეგება, მაგრამ ეს გერმანიაა, მისი ყოფილი კანცლერი "გაზპრომში" გადავიდა სამუშაოდ."

ანგელა მერკელის ვიზიტი საქართველოში ოფიციალურად დასრულდა. კავკასიური სამდღიანი ტურნეს ფარგლებში კანცლერი ჯერ სომხეთში, შემდეგ კი აზერბაიჯანში გაემგზავრება.

გაიგე მეტი: