გერმანიის კანცლერმა, ანგელა მერკელმა თბილისის სახელმწიფო უნივერსიტეტის სტუდენტებთან შეხვედრისას რუსეთთან ურთიერთობასა და მასთან სავაჭრო პარტნიორობაზე ისაუბრა.

კანცლერმა აღნიშნა, რომ გერმანიისთვის მნიშვნელოვანია ურთიერთობა როგორც საქართველოსთან და კავკასიის სხვა ქვეყნებთან, ისე რუსეთთან. მისივე თქმით, ევროპა და რუსეთი "კარგ დროში კარგად თანამშრომლობდნენ" და ერთმანეთისგან ბევრი რამ ისწავლეს.

როგორც მერკელი ამბობს, იყო შთაბეჭდილება, რომ ცივი ომი არ დასრულებულა და ევროპა და რუსეთი ჯერ კიდევ რჩებოდნენ მტრებად:

"ვფიქრობ, რომ ევროკავშირი და ნატო რუსეთისთვის არაა საფრთხე. რუსეთმა უნდა გაიგოს ეს".

მერკელის თქმით, რუსეთი ურთულებს სიტუაციას საბჭოთა კავშირის ყოფილ ქვეყნებს, მათ შორის, საქართველოს ოკუპირებული აფხაზეთისა და ცხინვალის რეგიონის სახით.

გერმანიის კანცლერმა, ასევე, რუსეთთან სავაჭრო ურთიერთობაზე, კერძოდ კი, გაზისა და ნავთობის შესყიდვაზე ისაუბრა. როგორც მან აღნიშნა, ცივი ომის დროსაც ევროპასა და რუსეთს, მაშინ საბჭოთა კავშირს ამ მხრივ მჭიდრო კავშირი ჰქონდათ. მერკელის განმარტებით, გერმანიას არ შეუძლია უარი თქვას რუსეთთან თანამშრომლობაზე ამ მიმართულებით.

"რა თქმა უნდა, აზერბაიჯანიდანაც შეგვიძლია გაზის მიღებას. სიმართლე ისაა, რომ ამერიკული გაზის მიღება არ არის იმავე ფასად შესაძლებელი, როგორც რუსული გაზის მიღება. რა თქმა უნდა, არ ვარ წინააღმდეგი რუსეთთან სავაჭრო გვქონდეს ამ მიმართულებით".