ღვინის ეროვნული სააგენტოს ინფორმაციით, საქართველო ღვინის საექსპორტო ფასით მსოფლიოში მე-5 ადგილს იკავებს. ღვინის ეკონომისტების ამერიკული ასოციაციის (AAWE) მონაცემების მიხედვით, 2014-16 წლებში ექსპორტზე გატანილი ერთი ლიტრი ქართული ღვინის საშუალო ღირებულება $3,49-ია.

ამავე რეიტინგით, პირველ ადგილს საფრანგეთი იკავებს ($6,59), მას მოსდევს ახალი ზელანდია ($5,39), მესამე ადგილზე კი ამერიკის შეერთებული შტატებია ($3,68). მეოთხე ადგილს კი ავსტრია იკავებს ($3,51).

საქართველოს აღნიშნულ რეიტინგში ჩამორჩებიან ისეთი ქვეყნები, როგორიცაა ხორვატია ($3,41), არგენტინა ($3,11 ), პორტუგალია ($3,07), გერმანია ($3,06) და იტალია ($3,06).

ღვინის ეროვნული სააგენტოს მარკეტინგისა და საზოგადოებასთან ურთიერთობის დეპარტამენტის უფროსის, ირაკლი ჩოლობარგიას განცხადებით, აღნიშნული რეიტინგი ქართული ღვინის მაღალ ხარისხზე მიუთითებს.