იტალიის ქალაქ გენუაში საავტომობილო ხიდის ჩამონგრევის შედეგად გარდაცვლილთა რიცხვი 43-ს აღწევს. BBC-ს ინფორმაციით, მაშველებმა ნანგრევებში კიდევ რამდენიმე ცხედარი იპოვეს. მათი ცნობით, დანგრეულ მანქანაში ნაპოვნი სამი გარდაცვლილი ადამიანი ერთი ოჯახიდან იყო. მიუხედავად იმისა, რომ ყველა დაკარგული უკვე ნაპოვნია, სამძებრო ღონისძიებები ისევ გრძელდება.

კომპანიამ, რომელიც ხიდზე მუშაობდა, გარდაცვლილთა ოჯახებისთვის ფონდი შექმნა. ხელისუფლებამ კი სპეციალური კომისია ჩამოაყალიბა, რომელიც კატასტროფის გამომწვევ მიზეზებს დაადგენს.

შაბათს, 18 აგვისტოს იტალიის პრეზიდენტმა, სერჯო მატარელამ და პრემიერ-მინისტრმა, ჯუზეპე კონტემ გენუაში დაღუპული 18 ადამიანის დაკრძალვა გამართეს.

იტალიის ქალაქ გენუასთან ახლოს საავტომობილო ხიდი ჩაინგრა. იტალიის ტრანსპორტის მინისტრმა, დანილო ტონინელიმ შემთხვევას "უდიდესი ტრაგედია" უწოდა. ჩანგრეული ხიდის ნაწილები 100 მეტრის სიღრმეზე, რკინიგზის ლიანდაგზე ჩაცვივდა.

უბედური შემთხვევა იმ გზატკეცილზე მოხდა, რომელიც იტალიასა და საფრანგეთის კურორტებს აკავშირებს. The Guardian წერს, რომ გზა დროის ამ პერიოდში გადატვირთული იყო, ვინაიდან ბევრი იტალიელი მიემგზავრებოდა მთებსა და სანაპიროებზე.

ქალაქი გენუა იტალიის ჩრდილო-დასავლეთით, ზღვასა და მთებს შორის მდებარეობს. მორანდის ხიდი, სადაც ინციდენტი მოხდა, 1967 წელს გაიხსნა და 1 კმ სიგრძისაა.