იტალიის ქალაქ გენუასთან ახლოს საავტომობილო ხიდი ჩაინგრა. The Guardian-ის ცნობით, გარდაცვლილია სულ მცირე 20 ადამიანი. იტალიის ტრანსპორტის მინისტრი, დანილო ტონინელი შემთხვევას "უდიდეს ტრაგედიას" უწოდებს.

ადგილობრივი სასწრაფო სამედიცინო დახმარების წარმომადგენლების ინფორმაციით, მათ შემთხვევის ადგილზე ათეულობით გარდაცვლილი დახვდათ.

ფოტო: AP

ფოტო: Luca Zennaro/EPA

ჩანგრეული ხიდის ნაწილები 100 მეტრის სიღრმეზე, რკინიგზის ლიანდაგზე ჩაცვივდა. პოლიციის ინფორმაციით, ხიდთან ერთად ჩაცვივდა მსუბუქი და სატვირთო ავტომანქანები.

უბედური შემთხვევა იმ გზატკეცილზე მოხდა, რომელიც იტალიასა და საფრანგეთის კურორტებს აკავშირებს. The Guardian წერს, რომ გზა დროის ამ პერიოდში გადატვირთული იყო, ვინაიდან ბევრი იტალიელი მიემგზავრება მთებსა და სანაპიროებზე.

ქალაქი გენუა იტალიის ჩრდილო-დასავლეთით, ზღვასა და მთებს შორის მდებარეობს. მორანდის ხიდი, სადაც ინციდენტი მოხდა, 1967 წელს გაიხსნა და 1 კმ სიგრძისაა.