საგანგებო სიტუაციების მართვის სამსახურის უფროსის მოვალეობის შემსრულებელი, შალვა ხუციშვილი აცხადებს, რომ ყოფილ სასტუმრო ლეოგრანდიდან (ამჟამად სასტუმრო ველმონდი) დღეს, 16 აგვისტოს და ხვალ სტუმრები უნდა გამოიყვანონ და სხვა შენობაში გადაიყვანონ.

ხუციშვილის განცხადებით, ამ ეტაპზე მიმდინარეობს ოთხმხრივი მოლაპარაკება საგანგებო სიტუაციების მართვის სამსახურს, სასტუმროს ადმინისტრაციას, აჭარის მთავრობასა და აჭარის ტურიზმის დეპარტამენტს შორის.

უწყების განცხადებით, რეკომენდაციებიდან ყველაზე კრიტიკული კვამლის გამწოვი სისტემის არარსებობაა და სწორედ ამ სისტემის არასწორი მუშაობისა და გაუმართაობის გამო, დეკემბრის თვეში, 11 ადამიანი დაიღუპა.

"ჩვენი პრინციპული მოთხოვნაა, რომ ეს სისტემა მოწესრიგდეს. 24-სართულიანი სასტუმროს შემთხვევაში, ხანძრის დროს, ადამიანს სანამ მეხანძრე-მაშველი ჩამოიყვანს, ის კვამლისგან არ უნდა გაიგუდოს. მთელი მსოფლიო ამ სახანძრო პრინციპით მოქმედებს", - განაცხადა ხუციშვილმა.

სასტუმროს წარმომადგენლების ადვოკატი, კახაბერ წერეთელი უწყების მიერ 15 აგვისტოს გავრცელებულ განცხადებას გამოეხმაურა, სადაც ეწერა, რომ სასტუმროს საქმიანობის შესაჩერებლად მხოლოდ ორი დღე აქვს. მისი თქმით, ეს ვადა მათ მიმდინარე წლის ბოლომდე ჰქონდათ და მსგავსი გადაწყვეტილება აგვისტოში, როდესაც ტურისტული სეზონის პიკია, გამოუსწორებელ შედეგებს მოუტანს სასტუმროს.

24 ნოემბრის ღამეს, სასტუმრო ლეოგრანდში გაჩენილი ხანძრის შედეგად, 11 ადამიანი დაიღუპა. მათ შორის, 10 საქართველოს, ხოლო ერთი ირანის მოქალაქე. მაშველებმა და პოლიციელებმა სასტუმროს შენობიდან ასზე მეტი ადამიანის ევაკუაცია შეძლეს. 20-მდე ადამიანი სხვადასხვა სირთულის ინტოქსიკაციის გამო, ბათუმის კლინიკებში გადაიყვანეს.