პრეზიდენტმა დაგროვებითი პენსიის შესახებ კანონს ხელი მოაწერა. როგორც პრეზიდენტის ადმინისტრაციის პრესსამსახურმა On.ge-ს უთხრა, პრეზიდენტმა კანონს წინა კვირას მოაწერა ხელი. საქართველოს პარლამენტმა საპენსიო რეფორმას 21 ივლისს მესამე მოსმენით დაუჭირა მხარი.

კანონპროექტის მიხედვით, სქემაში ჩართვა სავალდებულო იქნება 40 წლამდე პირებისთვის, 40 წლის ზემოთ კი - ნებაყოფლობითი. სისტემაში სავალდებულო წესით ჩაერთვება ყველა დასაქმებული, ხოლო ნებაყოფლობით - ნებისმიერი თვითდასაქმებული.

საქართველოს ფინანსთა სამინისტრომ საპენსიო სააგენტოს დირექტორის თანამდებობაზე ვაკანსია უკვე გამოაქვეყნა. შერჩეული კანდიდატის ხელფასი 10 ათასიდან 15 ათას ლარამდე იქნება.

კანონი, რამდენიმე მუხლის გამოკლებით, გამოქვეყნებისთანავე ამოქმედდა. დაგროვებითი საპენსიო სქემის ადმინისტრირებისა და სქემაში მონაწილეობის შესახებ მუხლები 2019 წლის პირველი იანვრიდან ამოქმედდება. ხოლო აქტივების მმართველი კომპანიების არჩევის უფლების შესახებ მუხლი 2021 წლის პირველი იანვრიდან ამოქმედდება.

როგორ გროვდება პენსია

დასაქმებულის საპენსიო ანგარიშზე ყოველთვიურად დაუბეგრავი ხელფასის 6 პროცენტი გროვდება. აქედან 2 პროცენტი დასაქმებულის ხელფასიდან აკლდება, 2 პროცენტს დამსაქმებელი იხდის, დარჩენილი 2 პროცენტს კი - სახელმწიფო.

წარმოვიდგინოთ, რომ თქვენი დაუბეგრავი ხელფასი არის 1 000 ლარი, საშემოსავლოს ჩამოჭრის შემდეგ 800 ლარს აიღებთ. დაუბეგრავი ხელფასის 4-პროცენტიანი შენატანი, რომელიც დამსაქმებელმა და დასაქმებულმა უნდა გააკეთონ, 40 ლარია. ეს თანხა, შესაძლოა, თქვენს ხელზე ასაღებ ხელფასს მოაკლდეს, 800 ლარის ნაცვლად კი 760 აიღოთ.

შესაძლოა, რომ დამსაქმებელმა ორი პროცენტი თვითონ გადაიხადოს, ხოლო ორი პროცენტი დასაქმებულს ჩამოაჭრას ხელფასიდან, ამ შემთხვევაში თქვენი ხელფასი 780 ლარი იქნება.

სხვა შემთხვევაში, შესაძლოა, დამსაქმებელმა დაუბეგრავი ხელფასი მოგიმატოთ, რათა ხელზე იგივე თანხა აიღოთ. 1 000 ლარის შემთხვევაში, მისი ხარჯი 5,26 პროცენტით გაიზრდება, ანუ მისი ხარჯი 52,6 ლარით მოიმატებს.

გაიგეთ მეტი: რა უნდა ვიცოდეთ დაგროვებით საპენსიო სისტემაზე - მოკლედ