სტიქიის შედეგად დაზიანებულ ბორჯომის ქუჩებში და ქალაქის ისტორიულ პარკში გაწმენდითი სამუშაოები მიმდინარეობს.

საგანგებო შტაბის წევრების ინფორმაციით, ყველაზე რთული ვითარება ამ დროისთვის ბორჯომის ცენტრალურ პარკში რჩება.

გარდა ამისა, წვიმის და სეტყვის შედეგად დაზიანდა წაღვერი-ბაკურიანის გზა, ხოლო სადგერის ჩაკეტილი გზა უკვე გაწმენდილია და მოძრაობა აღდგენილია.

სახელმწიფო უსაფრთხოებისა და კრიზისების მართვის საბჭოს მდივანმა მინდია ჯანელიძემ ჟურნალისტებთანს საუბრისას განაცხადა, რომ ამ დროისთვის კრიტიკული რაც არის, ეს არის პარკი. მისივე თქმით, იგი დღის განმავლობაში სანახევროდ გაიხსნება.

ჯერჯერობით უცნობია ზარალის ოდენობა და მიმდინარეობს მისი შეფასება.

ძლიერი წვიმა და სეტყვა ბორჯომის მუნიციპალიტეტში 4 აგვისტოს ღამით დაიწყო და დაახლოებით ნახევარ საათს გაგრძელდა, რის შედეგადაც ბორჯომის ქუჩები და სახლების პირველი სართულები დაიტბორა. მოსულმა სეტყვამ საცხოვრებელი სახლების ფანჯრებიც ჩაამსხვრია. აღნიშნულის გამო შეწყდა ელექტროენერგიის მიწოდებაც.