საავადმყოფოდან გამოწერის შემდეგ, ამერიკელმა მომღერალმა დემი ლოვატომ პირველი განცხადება გაავრცელა, რომლითაც გულშემატკივრებს თავისი მდგომარეობა გააცნო. ლოვატო გადაჭარბებული დოზის გამო ლოს-ანჯელესის საავადმყოფოში რამდენიმე დღის წინ მოხვდა.

"ყოველთვის გულწრფელად ვსაუბრობდი იმ მიჯაჭვულობებზე, რომლებიც გამაჩნდა. ვისწავლე, რომ ეს დაავადება დროსთან ერთად არ ქრება. ეს ისეთი რამაა, რაც ჯერ კიდევ არ გადამილახავს და ეს მცდელობა უნდა განვაგრძო", - დაწერა მან ინსტაგრამზე გამოქვეყნებულ პოსტში.

ლოვატომ მადლობა გადაუხადა ექიმებს, ოჯახს, გუნდს და ასევე თავის ფანებს, პოზიტიური დამოკიდებულებისთვის და დასძინა, რომ ბრძოლას აგრძელებს:

"მე ახლა დრო მჭირდება განსაკურნებლად და ჩემს სიფხიზლეზე ფოკუსირებისთვის, რათა გამოვჯანმრთელდე. არასდროს დავივიწყებ იმ სიყვარულს, რასაც ახლა მიზიარებთ და ველოდები იმ დღეს, როცა ვიტყვი, რომ მეორე ნაპირზე ვარ და ამ [დაავადებას] თავი დავაღწიე. მე ბრძოლას ვაგრძელებ".

A post shared by Demi Lovato (@ddlovato) on

24 ივლისს, უგონო მდგომარეობაში მყოფი დემი ლოვატო უცნობი ნარკოტიკული ნივთიერების გადაჭარბებული დოზის გამო საავადმყოფოში გადაიყვანეს. თავდაპირველად გავრცელებული ინფორმაციით, მისი მდგომარეობა ჰეროინს უკავშირდებოდა, თუმცა ლოვატოს ოჯახმა ეს ინფორმაცია არ დაადასტურა.

ლოვატოს ფსიქიკური ჯანმრთელობისა და კვებითი დარღვევების პრობლემები წლების განმავლობაში აწუხებდა. 2011 წელს, მან ბიპოლარული აშლილობისგან, ბულიმიისგან, დამოკიდებულებებისგან და თვითდაზიანებისგან გასათავისუფლებლად მკურნალობა დაიწყო, რის შემდეგაც, სარეაბილიტაციო ცენტრს მიმართა, სადაც ერთი წელი გაატარა.

2017 წლის მარტში, ლოვატომ განაცხადა, რომ სიფხიზლის 6 წელს აღნიშნავდა, თუმცა 2018 წლის ივნისში მან გამოუშვა სიმღერა Sober, რომელშიც ის მღეროდა, რომ სასმელს კვლავ იღებდა, რისთვისაც დედ-მამას და ფანებს ბოდიშს უხდიდა.