შინაგან საქმეთა სამინისტროს განცხადებით, თბილისში, ქუთაისსა და ზესტაფონში თაღლითური ჯგუფის ოთხი წევრი დააკავეს. უწყების განცხადებით, დაკავებულები მიმდინარე წლის მარტსა და აპრილში, სოციალური ქსელი ფეისბუქის ყალბი პროფილების გამოყენებით, თაღლითურად დაეუფლნენ ამავე სოციალური ქსელის მომხმარებლების კუთვნილ თანხებს.

უწყებაში ამბობენ, რომ ჩადენილი დანაშაულებრივი ქმედებების შედეგად, 6 მოქალაქე დაზარალდა. თაღლითური გზით მითვისებულმა თანხამ კი 1000-ზე მეტი ლარი შედგინა.

საქმეზე გამოძიება საქართველოს სსკ-ს 180-ე მუხლის მე-2 ნაწილის "ა" და "ბ" ქვეპუნქტებით, მე-4 ნაწილის "ბ" ქვეპუნქტით, წინასწარი შეთანხმებით ჯგუფის მიერ ჩადენილი თაღლითობის მუხლით მიმდინარეობს. დანაშაული 7-დან 10 წლამდე ვადით თავისუფლების აღკვეთას ითვალისწინებს.