ჭიათურის გამგეობაში ჰყავთ სპეციალური წარმომადგენლები, რომლებიც მაღალმთიან სოფლებში დადიან და ამოწმებენ, ამ სოფლის მოსახლეობა ნამდვილად საკუთარ ძროხასთან და საკუთარ ყანაში იღებს თუ არა ფოტოს. ამის შესახებ On.ge-ს ჭიათურის გამგებლის წარმომადგენელმა, როინ ხუციშვილმა განუცხადა.

ჭიათურის მუნიციპალიტეტის სოფელ ქვემო ჭალოვანის მოსახლეობა გამგეობის მოთხოვნებს აპროტესტებს, რომ მაღალმთიანი სტატუსის მინიჭებისთვის წარსადგენ ერთ-ერთ დოკუმენტად, პირუტყვთან და ყანაში გადაღებული ფოტოების მიტანა დაევალათ.

საზოგადოებრივი მაუწყებლის ეთერში გასულ სიუჟეტში, ერთ-ერთი ადგილობრივი მოსახლე ამბობს, რომ ასეთი მოთხოვნები მისთვის დამამცირებელია:

"ძროხებთან კი არა, შვილებთან და შვილიშვილებთან ვეღარ ვიღებ სურათს, ძროხას ენაცვალოს ჩემი თავი, მე ძროხას ვბან, ვკოცნი, თან ვყვები მაგრამ რატომ უნდა დამამციროს მე მთავრობამ ისე, რომ ძროხებთან, ქათმებთან, ღორებთან, ბოსტანში გადავიღოთ სურათი?"

სოფელი ზედა ჭალოვანი ხვაშითის ადმინისტრაციულ ერთეულს ეკუთვნის. ამ კონკრეტულ ერთეულში გამგებლის წარმომადგენელმა როინ ხუციშვილმა On.ge-სთან საუბარში განაცხადა, რომ რაღაც მეთოდით უნდა დაეფიქსირებინათ ის ადამიანები, რომლებიც ნამდვილად ცხოვრობდნენ სოფელში:

"ჩვენ გვთხოვდნენ, რომ მიგვეტანა შუქის გადასახადის ამონაწერი, რომ მაღალმთიანი სტატუსი მიგვენიჭებინა. გვჭირდებოდა ოჯახის წევრი მამაკაცი, ვინც იხდიდა ამ გადასახადს და დიასახლისები, რომლებსაც ვაღებინებდით სურათს პირუტყვთან, იმის დასადასტურებლად, რომ შინამეურნეობა აქვთ".

გამგებლის წარმომადგენელი აცხადებს, რომ ფოტოების გადაღების პროცესს, გამგეობის თანამშრომლებიც ესწრებოდნენ და ამოწმებდნენ, რომ ნამდვილად თავიანთ საკუთრებასთან იღებდნენ ფოტოს. ამის შემდეგ ეს ფოტოები მიჰქონდათ გამგეობაში და იქ ადასტურებდნენ, რომ ნამდვილად ამ კონკრეტული ოჯახის იყო შინაური პირუტყვი, ყანა და ბოსტანი.

როგორც როინ ხუციშვილი განმარტავს, გამგეობის ინიციატივა ჭიათურის მუნიციპალიტეტში შემავალ ყველა მაღალმთიანი სტატუსის მქონე სოფელს ეხება:

"ეს იმიტომ ხდება, რომ აქედან ძალიან ბევრი ხალხი წასულია, სოფლები დაცლილია, რითი დავამტკიცოთ, რომ ადამიანი ნამდვილად ცხოვრობს თუ არ ცხოვრობს ამ სოფელში? ამის დამამტკიცებელი საბუთი არის ერთი, რომ ის იხდის ნამდვილად დენის გადასახადს და მეორე არის ის, რომ ნამდვილად არის იქ და სოფლის მეურნეობას ეწევა. ამ ხალხს რა გონია ახლა, ვერ გავიგე, ჩვენ ჰაერზე მივცემთ ყველას მაღალმთიან სტატუსს? თბილისში რომ კაცი ცხოვრობს, სოფელში სახლი აქვს და 3-4 წელიწადი წასულია - მას ხომ არ მივანიჭებთ ამ სტატუსს? როგორ გავარჩიოთ ეს ხალხი ერთმანეთისგან? რა პროტესტი აქვს ამ ხალხს ვერ გავიგე, ვეხმარებით, გვერდში ვუდგავართ და კიდე პროტესტი აქვთ".

საქართველოს მთავრობამ 2016 წლის გაზაფხულზე მიიღო კანონი, რომლის მიხედვითაც განისაზღვრა მაღალმთიანი დასახლების სტატუსი და იქ მცხოვრებ მოსახლეობას გარკვეული შეღავათები დაუწესდა.