ვისოლ ჯგუფისა და ილიას სახელმწიფო უნივერსიტეტის დახმარებით, 200-მდე სტუდენტს შესაძლებლობა ექნება, საქართველოს რეგიონებში იმოგზაუროს და ზაფხულის ბოლო თვე საინტერესო საქმიანობას დაუთმოს. "საზაფხულო სტუდენტური მოგზაურობა #იზრუნე" 6 აგვისტოს აიღებს სტარტს და აგვისტოს ბოლომდე გაგრძელდება. სტუდენტები ოთხ ნაკადად გაემგზავრებიან ილიას სახელმწიფო უნივერსიტეტის სამეცნიერო-კვლევით ბაზებზე ყაზბეგსა და დედოფლისწყაროში, სადაც ადგილობრივ მოსახლეობას სამეურნეო თუ ტურისტულ საქმიანობაში დაეხმარებიან. პროექტის პარტნიორები არიან საქართველოს ფერმერთა ასოციაცია, არასამთავრობო გარემოსდაცვითი ორგანიზაცია CENN და USAID.

როგორც ვისოლ ჯგუფის პრეზიდენტი სოსო ფხაკაძე აღნიშნავს, ძირითადი აქტივობები მიმართული იქნება იმ პრობლემებსა და გამოწვევებზე, რომლებიც რეგიონებში სოფლის მეურნეობის, გარემოს დაცვისა და ტურიზმის კუთხით არსებობს.

"ამ ეტაპზე პროექტი მხოლოდ ილიას სახელმწიფო უნივერსიტეტის სტუდენტებისთვისაა, მაგრამ ვფიქრობთ, მომავალ წელს პროექტი მთელი ზაფხულის განმავლობაში გაგრძელდება და მასში მონაწილეობის საშუალება ნებისმიერ სტუდენტს მიეცემა", – ამბობს ფხაკაძე.

პროექტის მონაწილეები სამოტივაციო წერილის საფუძველზე შეირჩევიან. როგორც ილიას სახელმწიფო უნივერსიტეტის რექტორი, გიგა ზედანია აღნიშნავს, პროექტში მონაწილეობის სურვილი უკვე 100-ზე მეტმა სტუდენტმა გამოთქვა.

"უმაღლესი განათლება მხოლოდ უნივერსიტეტის კედლებში არ უნდა ხდებოდეს და მხოლოდ გაწერილი პროგრამის შესრულებას არ უნდა ემსახურებოდეს. უნივერსიტეტი იმისთვისაა, რომ საკუთარი თავი ბევრი კუთხით გამოსცადო. აღსანიშნავია სოლიდარობის კომპონენტიც, რომელიც ამ პროექტში დევს. მისასალმებელია, როცა კერძო ბიზნესი ერთვება მსგავს ინიციატივაში, რადგან ერთი მხრივ, მათაც სჭირდებათ დამოუკიდებელი, განათლებული კადრები, მეორე მხრივ კი, ეს არის ზრუნვა ქვეყნის მომავალზე. ასე რომ, ეს უნარები და ცოდნა, რომელსაც პროექტში შეიძენენ სტუდენტები, ძალიან მნიშვნელოვანია ყველა მხარისათვის", - ამბობს გიგა ზედანია.

მომავალ წელს პროექტი მთელი ზაფხულის განმავლობაში გაგრძელდება და მასში ჩართვის საშუალება სტუდენტებს მთელი საქართველოდან მიეცემათ.