ცოტა ხნის წინ ამაზონის ჯუნგლებში დააფიქსირეს აბორიგენი კაცი, რომლის ტომიც 22 წლის წინ ფერმერებმა ამოხოცეს. ვიდეო ბრაზილიის მთავრობის აბორიგენული მოსახლეობის დამცველმა ორგანიზაციამ Funai-მ გაავრცელა. ვიდეოში ჩანს მამაკაცი, რომელიც ცულით ხეს ჭრის. Funai კაცს თვალყურს 1996 წლიდან ადევნებს. ბრაზილიაში აბორიგენები კანონით არიან დაცულნი და მათთან მიახლოება ან კონტაქტი აკრძალულია. ეს ადამიანი, რომლის სახელი და წარმომავლობაც არავინ იცის, ბრაზილიის ჩრდილოეთ ნაწილში არსებულ პროვინცია რონდონიის ჩრდილო-დასავლეთში ცხოვრობს. ეს დაახლოებით 4 400 ჰექტრის ზომის არეალია, სადაც შესვლის უფლება არავის აქვს.

აბორიგენის გადაადგილებას ორგანიზაცია თვალყურს იმიტომ ადევნებს, რომ ბრაზილიის კონსტიტუციით, მიწა, რომელზეც აბორიგენი მოსახლეობა ცხოვრობს, ტომის საკუთრებაა და არა - ქვეყნის. ამიტომაც, ბრაზილიის მთავრობას მუდმივად უწევს იმის დამტკიცება, რომ კაცი კვლავ ცოცხალია.

ამ ადამიანზე თითქმის არაფერია ცნობილი. მისი ტომის უმეტესი ნაწილი 1970-1980 წლებში განადგურდა, როდესაც მათ საცხოვრებელთან ახლოს საავტომობილო გზა გაიყვანეს. 1995 წელს კი გადარჩენილ წევრებს თავს ფერმერები დაესხნენ. ამ შემთხვევის გარდა, ვიდეოზე აღბეჭდილ კაცს ცივილიზაციასთან კონტაქტი არასდროს ჰქონია.

სახლი, რომელიც კაცმა ააშენა და შემდეგ მიატოვა.

სახლი, რომელიც კაცმა ააშენა და შემდეგ მიატოვა.

ფოტო: Survival

კაცი ხშირად აგებს მახეებს ცხოველებისთვის. გარდა ამისა, მან სახლიც კი ააშენა, თუმცა მოგვიანებით მასში ცხოვრება გადაიფიქრა.

Funai-ს რეგიონული კოორდინატორი აცხადებს, რომ კაცი 50-60 წლისაა და კარგ ფიზიკურ მდგომარეობაშია. ის წარმატებით ნადირობს და სიმინდის რამდენიმე პლანტაციას უვლის. ორგანიზაციის თქმით, ტომის უკანასკნელ წევრს ცივილიზაციასთან კონტაქტი არ სურს და მან ეს უცხო ადამიანების მიმართ შორიდან ისრების სროლით უკვე რამდენჯერმე გამოხატა. "ფერმერებთან მომხდარი ინციდენტის შემდეგ ის ძალიან ფრთხილობს და გარე სამყაროსთან ყველანაირ კონტაქტს ერიდება ," - ამბობს ორგანიზაციის წევრი ფიონა ვოტსონი.

გარე სამყაროსთან კონტაქტი აბორიგენისთვის ძალიან საშიშია. თანამედროვე ადამიანებისგან მას ისეთ დაავადებები შეიძლება შეეყაროს, რომლებსაც მისი სხეული და იმუნიტეტი ვერ გაუმკლავდება.

დღეისათვის ბრაზილიის ჯუნგლებში იმაზე მეტი აბორიგენი ტომი ცხოვრობს, ვიდრე დედამიწის ნებისმიერ სხვა ადგილას.