სახელმწიფო უსაფრთხოების სამსახურის ინფორმაციით, თბილისსა და გორში მდებარე 15 სააფთიაქო დაწესებულებებში ფსიქოტროპული საშუალებების უკანონო რეალიზაციის ფაქტები გამოვლინდა.

უწყების ცნობით, მათ აღნიშნულ აფთიაქებში სხვადასხვა დასახელების ფსიქოტროპული საშუალებები რეცეპტის გარეშე იყიდეს. სუს-ის თქმით, ეს ნიშნავს იმას, რომ 15-ივე აფთიაქში ფსიქოტროპული საშუალებების რეალიზაცია უკონტროლოდ ხორციელდება.

სუს-ის ინფორმაციით, ჩხრეკა ჩატარდა შემდეგ სააფთიაქო დაწესენბულებებში: შპს ენძელაში; შპს ნალიში; შპს ფარმა 2016-ში; შპს ფარმაგიდი +-ში; შპს მ.ქ. ფარმაში; შპს მულტი ვსლიში; შპს დათუჩაში; შპს სან ფარმაში; შპს ნინფარმიში; შპს იმედი +-ში; შპს ნანფარმაში; შპს ფარმა-27-ში; შპს ნათი+-ში; შპს პოლისიფარმაში და შპს იმედში.

სუს-ში ამბობენ, რომ ჩხრეკისას ამოღებულია დიდი რაოდენობით გადამალული ფსიქოტროპული პრეპარატები. უწყების ცნობითვე, გრძელდება გამოძიება იმ პირების გამოსავლენად, რომლებიც მფარველობენ და ხელს უწყობენ აღნიშნული პრეპარატების უკანონოდ გავრცელებას.