აგვისტოს დასასრული განსაკუთრებით სასიამოვნო იქნება ელექტრონული და ჰიპ-ჰოპ მუსიკის მოყვარული დამსვენებლებისთვის. On.ge-ს მკითხველმა უკვე იცის, რომ 23-26 აგვისტოს ანაკლიაში ახალი მუსიკალური ფესტივალი Echowaves გაიმართება.

ფესტივალის ჰედლაინერების ისედაც ხმაურიან სიას ახლახან, არც მეტი და არც ნაკლები, Die Antwoord დაემატა. სამხრეთაფრიკული დუეტი, რომლის შემადგენლობაშიც Ninja და იოლანდი ვისერი შედიან, 2008 წელს შეიქმნა და ახალი ჟღერადობით მაშინვე მიიპყრო მელომანების ყურადღება. მათი ცნობილი ჰიტებია: Ugly Boy, Enter the Ninja, Baby's on fire და I fink U Freeky.

ექსტრავაგანტული იმიჯისა და მარტივი, მაგრამ ენერგიით დამუხტული Zef რეპის გამო პროექტს უამრავი თაყვანისმცემელი ჰყავს საქართველოშიც.

Zef კონტრკულტურა თანასწორობის იდეას ემყარება და თეთრკანიანი სამხრეთაფრიკელი მუშათა კლასის ცხოვრებას ასახავს.

"შენ ხარ ღარიბი, მაგრამ მოდური, ხარ ღარიბი, მაგრამ ხარ სექსუალური, გაქვს შენი სტილი" - ასე აღწერს Zef-ის და ჯგუფის კონცეფციას იოლანდი ვისერი.

განსაკუთრებული პოპულარობა Die Antwoord-მა 2010 წელს მოიპოვა, როდესაც მათი ვიდეო Enter the Ninja წლის ერთ-ერთი ჰიტი გახდა და ინტერნეტში ვირუსულ ვიდეოდ იქცა.

ჯგუფს 4 სტუდიური ალბომი, 2 EP და 20-ზე მეტი სინგლი აქვს გამოშვებული. მათი ახალი ალბომი სახელწოდებით 27 მიმდინარე წლის ბოლომდე უნდა გამოვიდეს.

გარდა Die Antwoord-ისა, ფესტივალის ფარგლებში საქართველოში ჩამოვლენ: Tricky, Solomun, Ben Klock, Marcel Dettmann, Juan Atkins, Function, NU, Woo York, Henrik Schwarz, Antigoe, DJ TENNIS, Greenbeam&Leon.

პროექტს Anaklia Entertainment Group ახორციელებს, რომლის ხელმძღვანელი ბრანე კოსტადინოვია. ბრანე კოსტადინოვი ასევე EEMM ჯგუფის დამფუძნებელია. კომპანიის საქმიანობა 2001 წელს დაიწყო და ამ დროისთვის მათ მსოფლიოს 25 ქვეყანაში 3000-ზე მეტი ღონისძიება აქვთ ჩატარებული, "ბუქინგის" კუთხით კი 700-ზე მეტ არტისტთან უთანამშრომლიათ.

გაიგეთ მეტი: