ფინეთის დედაქალაქ ჰელსინკიში რუსეთის პრეზიდენტის, ვლადიმერ პუტინისა და აშშ-ის პრეზიდენტის, დონალდ ტრამპის სამიტი დაიწყო. შეხვედრა ფინეთის საპრეზიდენტო სასახლეში მიმდინარეობს. ეს არის ტრამპისა და პუტინის პირველი სამიტი.

ორივე პრეზიდენტი რამდენიმესაათიანი დაშორებით ჰელსინკიში დღეს, 16 ივლისს ჩაფრინდა. ოფიციალური შეხვედრა კი საათ-ნახევრის დაგვიანებით დაიწყო. საპრეზიდენტო სასახლეში ორივე ლიდერი ცალ-ცალკე მივიდა.

პუტინმა და ტრამპმა პირისპირ საათნახევრიანი მოლაპარაკებები უნდა გამართონ, რომელსაც მხოლოდ თარჯიმნები დაესწრებიან. მოლაპარაკებამდე ისინი პრესის წარმომადგენლებს შეხვდნენ.

რუსეთის პრეზიდენტმა განაცხადა, რომ მოხარულია ტრამპთან შეხვედრით. აშშ-ის პრეზიდენტმა, პირველ რიგში, პუტინს ფეხბურთის მსოფლიო თასის ჩატარება და რუსეთის ნაკრების წარმატებული ასპარეზობა მიულოცა. მან, ასევე, აღნიშნა, რომ ბევრი სასაუბრო აქვთ, ვაჭრობაზე, შეიარაღებაზე, ჩინეთზე და "მათ საერთო მეგობარზე, სი ძინპინზე". ტრამპს 2016 წლის არჩევნებში რუსეთის ჩარევასთან დაკავშირებით არაფერი უთქვამს.

"მგონია, რომ მსოფლიოს სურს გვნახოს როგორ ვაწყობთ ურთიერთობას. ჩვენ ორი დიდი ბირთვული ქვეყანა ვართ", - განაცხადა ტრამპმა.

პრეზიდენტებმა მხოლოდ მიმართვის შემდეგ ჩამოართვეს ერთმანეთს ხელი, რაც სამი წამი გაგრძელდა.

შეხვედრამდე ტრამპმა იმედი გამოთქვა, რომ ჰელსინკიში ორმხირივი შეხვედრა ქვეყნებს შორის ურთიერთობას გააუმჯობესებს.