შინაგან საქმეთა სამინისტროს გენერალური ინსპექციის განცხადებით, პოლიციელებმა კოკა კობალაძის ოჯახში ყოფნის ფაქტი დამალეს. უწყების განმარტებით, კობალაძეების საცხოვრებელ ბინაში გლდანი-ნაძალადევის განყოფილების პოლიციის თანამშრომლები, უბნის ორი ინსპექტორ-გამომძიებელი იყო მისული.

კოკა კობალაძის დედამ, თათა დავითულიანმა ტვ პირველის ეთერში განაცხადა, რომ პოლიციის ორმა თანამშრომელმა მისი შვილი სახლში სცემა და უგონო მდგომარეობაში დატოვა.

შსს განცხადებით, ორივე პოლიციელი დათხოვნილია შინაგან საქმეთა სამინისტროდან. ამასთან, სამსახურიდან გათავისუფლდნენ პოლიციელების უშუალო ხელმძღვანელი და ქალაქ თბილისისი პოლიციის დეპარტამენტის გლდანი-ნაძალადევის სამმართველოს უფროსი.

პოლიციელთა მხრიდან შესაძლო დანაშაულის ჩადენის ფაქტზე გამოძიება მიმდინარეობს თბილისის პროკურატურაში.