თბილისის მერის, კახა კალაძის ძაღლს, ტიფანის, რომელიც მთავრობის სხდომებსაც ესწრებოდა ახალი სახლი აქვს. ის მერის კაბინეტიდან თბილისის მერიის ეზოში, ნაგავსაყრელთან რამდენიმე მეტრში მოწყობილ სახლში გადაიყვანეს.

ფოტო, რომელიც ინტერნეტში გავრცელდა ჩანს, რომ ძაღლის სახლი ასფალტის საფარზეა მოწყობილი და ხეებიდან რამდენიმე მეტრის დაშორებითაა.

ფოტო 1: info 9 / ფოტო 2: gaius marius oboba

თბილისის მერიის ცხოველთა მონიტორინგის სამსახურის უფროსი ვახტანგ ლომჯარია On.ge-სთან საუბარში აღნიშნავს, რომ ძაღლი კარგ პირობებში ცხოვრობს, დღეში 2-ჯერ ასეირნებენ და კვირაში 2-ჯერ კინოლოგი მიჰყავთ.

"ამ შემთხვევაში, რაიმე ისეთი განსაკუთრებული ტემპერატურა, როგორშიც სხვა მიუსაფარი ან ეზოს ცხოველები არ არიან, ნამდვილად, ასე არ არის. როდესაც შეაწუხებს მზე შეუძლია სახლში შევიდეს, დანარჩენ შემთხვევაში გამოვიდეს იმ შემოფარგლულ ეზოში", - ასე პასუხობს ცხოველთა მონიტორინგის სამსახურის უფროსი სიცხესთან დაკავშირებით დასმულ კითხვას.

მისივე თქმით, ძაღლი სრულად გამოჯანმრთელებისა და გაზრდის შემდეგ ეზოში მათი სამსახურის რეკომენდაციით გადაიყვანეს, რათა მერის კაბინენტისგან განსხვავებით, მზის სხივების მიღების შესაძლებლობა ჰქონოდა.

ლომჯარიამ კომენტარის მოცემიდან რამდენიმე წუთში On.ge-ში დარეკა და ძაღლის საცხოვრებელთან დაკავშირებით დამატებითი დეტალების შესახებ ინფორმაცია მოგვაწოდა. მისი თქმით, ტიფანის თბილისის მერიის ეზოში კიდევ ერთი საცხოვრებელი აქვს, რომელიც ფოტოზე ასახულზე 3-4-ჯერ დიდია და უწყების თანამშრომლებს იქ წვიმის პერიოდში, დღე-ღამის ნებისმიერ მონაკვეთში, გადაჰყავთ ხოლმე.

დედაქალაქის მერი, კახა კალაძე თბილისის ცხოველთა მონიტორინგის სააგენტოს მუნიციპალურ თავშესაფარს 2018 წლის თებერვალში ესტუმრა. კალაძემ სწორედ მაშინ გადაწყვიტა ძაღლის წამოყვანა, რომელიც მერიის ინფორმაციით, უწყების შენობაში იზრდებოდა.