ადამიანები დიდი ხნის განმავლობაში ოცნებობდნენ, რომ კოსმოსში ემოგზაურათ და მზის ირგვლივ მბრუნავი პლანეტები საკუთარი თვალით ენახათ. სამყაროს ყველაზე ამოუცნობი ადგილების მიმართ დიდ ინტერესს ისიც ადასტურებს, რომ ამ თემაზე გადაღებული ფილმები თუ სერიალები ყოველთვის დიდი პოპულარობით სარგებლობდა.

გასული თუ ახლანდელი საუკუნის მიღწევების მიუხედავად, რომელიც ტექნოლოგიურ განვითარებასა და შესაბამისად კოსმოსის უკეთ ათვისების მხრივ მნიშვნელოვან წინგადადგმულ ნაბიჯებს მოიცავს, დედამიწის მაცხოვრებლების უმრავლესობისათვის, კოსმოსურ ხომალდში ჩაჯდომა და კოსმოსური მისიისთვის მზადება მიუღწეველ ოცნებად რჩება.

მიუხედავად ამისა, არსებობენ გამონაკლისებიც. 17 წლის ელისა კარსონმა მოახერხა და საკუთარ ოცნებასთან უკვე ძალიან ახლოსაა. ამერიკელი გოგოს მიზანია, რომ ის იყოს პირველი ადამიანი მარსზე, ამისთვის კი უკვე დიდი ხანია, რაც ნასაში სპეციალურ მომზადებას გადის, რათა პროფესიონალი ასტრონავტი გახდეს და 2023 წელს წითელ პლანეტაზე ფეხი დადგას.

ფოტო: Origo

გამორჩეულად ნიჭიერმა გოგომ ყურადღება ადრეულ ასაკშივე მიიქცია, რადგან ის პირველი ადამიანი იყო, რომელიც 14 წლის ასაკში ნასას ვიზიტორების 14-ვე ცენტრში იყო ნამყოფი. ოდნავ მოგვიანებით კი კოსმოსური აკადემიაც დაამთავრა.

ფოტო: nasablueberry

რა თქმა უნდა, მნიშვნელოვანი იყო, რომ ელისას ყველა აუცილებელი ნაბიჯის გადადგმა პატარა ასაკშივე მოესწრო. როგორც ვთქვით, მარსის მისია 2023 წლისთვის იგეგმება და ამ მოგზაურობისთვის, საგანგებოდ არჩეული ახალგაზრდა ასტრონავტი ფიზიკურადაც არაჩვეულებრივ ფორმაში უნდა იყოს და პარალელურად, აუცილებელ უნარებსაც კარგად ფლობდეს.

ფოტო: nasablueberry

ახალგაზრდა ასტრონავტი, რომელიც ჯერ სრულწლოვანიც კი არ არის და კოსმოსთან დაკავშირებით დიდებული გეგმები აქვს, ინგლისურის გარდა ჩინურად, ფრანგულად და ესპანურად საუბრობს. მისი ყველაზე დიდი გამოწვევა კი დროის უკმარისობაა, რომელიც ასეთ ამბიციურ და მიზანდასახულ ადამიანებს არასდროს ჰყოფნით.

"მარსზე გასამგზავრებლად მუდმივი ფიზიკური მომზადება საკმაოდ დიდ სიძნელეებთან არის დაკავშირებული, თუმცა მათთან გამკლავებას ყოველთვის ვახერხებ", - ამბობს ელისა.

ფოტო: Rocket Women

ასტრონავტობის გარდა, ელისა ყველასათვის მისაბაძი ახალგაზრდაა, რადგან თანატოლებს ყოველთვის მოუწოდებს, რომ მიუხედავად დასახული მიზნისკენ მიმავალ გზაზე არსებული უამრავი პრობლემებისა, საკუთარ ოცნებებზე უარი არასდროს თქვან. 17 წლის გოგოს ინსპირაციის წყარო კი განსაკუთრებით ქალი ასტრონავტები არიან.