სამდღიანი სამაშველო ოპერაცია დასრულდა. ტაილანდის გამოქვაბულში ჩარჩენილი 12 ბავშვი და მწვრთნელი გამოქვაბულიდან 17 დღის შემდეგ გამოიყვანეს. ინფორმაციას BBC ადასტურებს.

სამაშველო ოპერაცია ადგილობრივი დროით 10 საათზე დაიწყო, მასში 19 მყვინთავი იღებდა მონაწილეობას. გამოქვაბულში ოპერაციის განმავლობაში ბავშვებთან და მწვრთნელთან ერთად ექიმი და მაშველები იყვნენ.

The Guardian-ის ინფორმაციით, 8 ივლისს მღვიმიდან გამოყვანილმა ბავშვებმა მშობლები მინის ორად გაყოფილ სივრცეში ნახეს და მალე მათთან საუბარსაც შეძლებენ. ბავშვები კი, რომლებიც სამაშველო ოპერაციის დაწყებიდან მეორე დღეს გამოიყვანეს ოჯახის წევრების ნახვას ამ დრომდე ელოდებიან.

ექიმები ამბობენ, რომ ბიჭების ჯანმრთელობის მდგომარეობა დამაკმაყოფილებელია. იმის გამო, რომ ორ კვირაზე მეტი აბსოლუტურ სიბნელეში გაატარეს, მღვიმიდან თავის დაღწევის შემდეგ მზისგან დამცავ სათვალეებს ატარებენ. გამოცემის ინფორმაციით, ბავშვებს საავადმყოფოში დარჩენა სულ მცირე ერთი კვირა მოუწევთ.

23 ივნისს ტაილანდის გამოქვაბულში გაუჩინარებული 12 ფეხბურთელი ბავშვი და მათი მწვრთნელი ცხრადღიანი ძებნის შემდეგ, გამოქვაბულის სიღრმეში ბრიტანელმა მყვინთავებმა ცოცხლები იპოვეს. ისინი ტურისტებისთვის კარგად ნაცნობ გამოქვაბულში საფეხბურთო ვარჯიშის შემდეგ მწვრთნელთან ერთად შევიდნენ, თუმცა მუსონური წვიმების გამო, წყლის დონემ მოულოდნელად მოიმატა და გარეთ გამოსვლა ვეღარ მოახერხეს.

7 ივლისს საღამოს დაწყებულმა წვიმამ, რომელიც კვირას გაგრძელდა ტაილანდის ხელისუფლება აიძულა ოპერაცია ნაჩქარევად დაეწყო. სამაშველო ოპერაცია სრულ სიბნელეში სიარულს, ცოცვას, ცურვას და ყვინთვას გულისხმობდა. მაშველებს და ბიჭებს სახეზე სპეციალური ნიღბები ეკეთათ, ასევე თან ჰქონდათ ჟანგბადის ბალონები. თითოეულ ბიჭს ორი მაშველი აცილებდა.

ფოტო: The Guardian

ამავე თემაზე: მღვიმის მძევლების ისტორიები - რა ვიცით ტაილანდელ ბავშვებსა და მათ მწვრთნელზე